Indian Super League final luh inchuhna khelh tan a ni a. Semi-final hmasa zawk first leg-ah Bengaluru FC in an club legend Sunil Chhetri hmangin dinhmun tha zawk an luah.
Thawhlehni zanah Mumbai Football Arena-ah ISL semi-final first leg hi khelh a ni a. Mumbai City FC leh Bengaluru FC te an insu.
Hun pawimawhah player pawimawh a rawn inlar. Bengaluru FC an khel chhe lo, chutihrualin league season hmang tha tak Mumbai City in nidang ang thovin ball an thunun.
Second half-ah substitute bench atangin Chhetri dah luh a ni a. Khelmual a luh hnu lawkah danglamna siam nghalin minute 78-naah an chakna goal a tauh lut.
Mumbai City in ball an chang hnem a, muallaiah Lalengmawia leh Ahmed Jahouh te inkawpin inkhel kaihruai mahse Bengaluru tlarhnung ding nghet tak hmaah goal hlauhawm siam an harsat a. Blues tlarhnung in ISL forward hlauhawm Lallianzuala an veng tha.
Blues chak nan kum 38 mi Chhetri a pawimawh bakah tlarhnungah Aleksandar Jovanovic chu an lungpui a ni a. Midifielder Suresh Singh pawh Mumbai in ball hlauhawm an chhuah tam theih loh chhan a ni.
March 12 hian Kanteerava stadium-ah Bengaluru FC in second leg an thleng ve leh ang.
Bengaluru FC head coach Simon Grayson chuan, “Inkhelh hma in chak thei dinhmun a ding ngei chungin second leg kan khelh a pawimawhzia kan sawi. Mumbai khan bul an tan that avangin kan tlo a ngai a, hun rei tak chhung chu theihtawp chhuah a kan tan a ngai.”
“First half kan khelhdanah lungawithlak vek lo tih lai nei mah ila second half-ah kan danglam a. Goal pawh khung belh thei kan ni. 1-0 hi a tha, mahse engmah kan la hlenchhuak lo.” a ti.