Manik Saha chu Nilaini khan a zawna a vawi hnih nan Tripura chief minister atan lak luh a ni.
Tripura sorkar thar la luh inkhawmah hian Prime Minister Narendra Modi, Union Home Minister Amit Shah leh BJP chief JP Nadda te pawh an tel a. Modi leh Shah hi Thawhlehni khan an thleng a, lak luh inkhawm hi Agartala-a Vivekananda Maidan-ah neih a ni.
Thawhtanni khan Saha hian an state inthlan neih zawh taka BJP MLA atana thlan chhuahte chuan an hruaitu atan thlangin governor hnenah sorkar a siam theih thu a thlen nghal.
Nilainia lak luh zingah hian Ratan Lal Nath, Pranjit Singha Roy, Santana Chakma, Sushanta Chowdhury, Tinku Roy, Bikas Debbarma, Sudhangshu Das leh Shukla Charan Noatia te an tel bawk.
Assembly inthlan neih zawh takah khan BJP hian bial 60 awmah 32 an la a, vote tla zinga 39% vel an hmu phak a. Tipra Motha chu party lian ber pahnihna niin bial 13 an la.
Tipra Motha chief Pradyot Deb Barma chuan Saha hi a lawmpui thu sawiin MLA ngah ber dawt an nih angin Tipra Motha chuan an state mipuite tan hna an thawk zel dawn tih a sawi.
Saha hian nikum khan Biplab Kumar Deb thlakin chief minister a ni a, inthlan hma lawkah a ni tan a. BJP-ah hian a hniam ber atanga bul tanin kum 2020 khan an state-a an president a ni tan a, chief minister a nih hma zawng hian state inthlanah a la ding ngai lo. Chief minister a nih hnuah Town Bardowali bial bye-election-ah thlan tlin zui a ni a, tun inthlanah he bialah bawk hian a tling leh a ni.
Kum 2016 khan Saha hian Congress chhuahsanin BJP a zawm a, March, 2022 khan Rajya Sabha member atan thlan a ni.
Kum 69 mi, dental surgeon Saha hi hmingchhiatna nei lo nia sawi thin niin inthlan a hnaih mek laia Deb-a larna leh hmingthatna a tlakhniam mek laiin party tlahniam titho leh turin BJP hian chief minister atan an thlang a, inthlanah pawh mahnia sorkarna siam thei khawpin a chakpui leh ta a ni.