A tlangpuiin, hmeichhiate hian sex chungchangah harsatna pali an hma-chhawn thin.
Chungte chu:
Desire disorders:
Sex hman châkna i nei lova, phurna pawh i nei lem hlei lo bawk
Arousal disorders:
I taksa atanga châkna leh thathona a awm awm i hre lova, i che chhuak peih lo
Orgasmic disorders:
A vawrtawp i thleng ngai lova, vawrtawp pawh thleng mahla, nâ i ti tho
Sexual pain disorders:
Sex hman lai leh hman hnu-a nâ tih ngawih ngawihna
Sex-a chian lohna hi engvanga thleng nge a nih?
Chhan hrang hrang a awm thei ang. Chung zingah chuan naupai danna damdawi ei vang te, cancer enkawlna lak vang te, zunthlum leh thinsen sâng vang te, Zu in nasat vang leh serh-a natna hrang hrang vangte-in a lo awm nghal mai thin.
Rilruhah, kawp-puite nena inkar buai vang leh tunhmaa rilru leh taksa tihhrehawmna (tunah pawh a ni thei) lo tawrh tawh vangte hian chian lohna leh fel lohna hi a lo awm thin.
Naupai lai hian tunhma anga thathona leh phurna i nei tlem mai thei a, nau hrin hnu-ah emaw hnute pek chhung zawngte pawh hian a buai thei tho. Tin, thihul hnu-ah hian hmeichhe tam takte hian châkna an nei chau tial tial a, serh a ro tawh thin avangin sex hman laite hian a na thin a, tarlan fo tawh angin, taksaa ‘estrogen’ hormone lo kiam tak zel vang a ni.
Tin, nitin-a rilruhahna leh hrehawmna hrang hrangte pawh hian sex hmannaah nghawng thui tak a nei bawk a, hnathawhnaa chauh leh hah lutuk vang te, naupang enkawl reng ngaih vang te hian phurna hi a bo ve duak thei.
Chu bakah, chawl mang hlei lova hman reng vangte pawh hian ninawm lamah a kal ve thei tho bawk.
Anih chuan, ‘he harsatna hi ka tawk ta’ tih engtinnge ka hriat theih ang?
Kawppui neite zinga zaa 70% te hian engemaw hun berah hian harsatna an tawk deuh vek a. Hmeichhiate pawh hian engtik lai berah emaw chuan duhtawk lo leh duhkhawp lohna ang chi an nei thin. Hei vang ringawt hi chuan he harsatna hi i tawk ve ta tihna erawh a kawk hran lo.
Hman i châk lo tak zet emaw nuam tih miah lohna i neih chiah khan thil fel lo a awm ta tihna a ni a, a rang thei ang bera doctor rawn vat tur. Doctor bula i sawi hi mimal thil ani tih hrereng la, a chhan leh vang te bakah a enkawlna tur thlengin inpawh taka sawi dun tur a ni.
Engnge ka tih theih te, a awm em?
A chunga tarlan tak, ‘Desire’ hi i harsatna anih chuan kalphung leh tihdan phung tlema her danglam a ngai dawn tihna a ni a.
Position han thlak kual vel emaw zing taka hmang thinte tan khât lutuk lem si lova hman te pawh a ngai ang.
‘Arousal’ anih chuan serh-a hnawih tur ‘cream’ leh a ro lutuk tur venna, ‘lubricant’ te hman a tul dawn tihna a ni a, ‘thihul’ dinhmunah i awm tawh anih erawh chuan ‘estrogen’ cream emaw a eia ei chi emaw a tul dawn tihna a ni a, doctor thurawn i la hmasa phawt tur a ni ang.
‘Orgasm’ -ah erawh hi chuan inkhal (foreplay) neih tam tawk loh vang leh inchawhphurna uar zawk kalpui loh vang a ni tlangpui a. A tak rama luh hma-in, hmanhmawh hauh lovin, hahdam leh inngai pawimawh takin ‘foreplay’ hi hman thin tur a ni. Hei hi a pawimawh , hmei-chhe tam zawk hian a nawmna leh a vawrtawp an hre ngai lo. Hemi chung-changah hian nupa inkarah inpawh taka sawi dun leh duhzawngte inhrilh a, zau taka ngaihdan inpek tawn tur a ni a. Zahthlaka lak chi a ni lova, ngawih chuh tlatna zawka hi a mualpho thlak.
‘Sexual pain’ -anih ve thung chuan ‘position’ lak dan tihdanglam a ngai dawn a, ‘women on top’ an tih mai, a chunga lama tan te pawh a sual lovang. Hei hi mahni duhdan anga kalpui theih a nih avangin, indim a ngaih hunah te pawh a tangkai em em a ni.
Harsatna a la awm fo anih erawh chuan doctor rawn vat tur a ni a, sex hman laia ‘nâ’ a lo awmna chhan hi a tam ang reng hle a, a chhan leh vang dik tak zawn chhuah a ngai ngei dawn a, a tha ber tur a kawhhmuh thei bawk ang che.