Benfica in goal hmaah an hriamzia Europe hmaah an pholang a. Belgian club Club Brugge lakah goal nga khungin UEFA Champions League quarter-final an inhlangkai.
Thawhlehni zana Estadio da Luz-ah Benfica hian an mikhualte hi 5-1 in an hneh a, first leg-ah 2-0 a an chak tawh avangin 7-1 aggregate in an chak.
Benfica tan striker ngaihven hlawh Goncalo Ramos chuan goal hnih khungin a team tan a langsar a. Kum 21 mi hian tun season-ah goal 23 a khung tawh.
Midfield-ah Joao Mario chu engkim khaikhawmtu niin an goal li-na penalty atangin a khung a. Rafa Silva leh David Neres ten an goal hmasa ber leh hnuhnung ber an khung bawk.
Benfica hi tualchhung league-ah a zawna vawi sarih chak lai niin hetih chhung hian goal 18 an khung a, goal khat chauh an chhuah.
Goal hmahruai khungtu Silva chuan, “Tum pakhat chiah kan nei, chu chu kan hma a awm inkhel apianga chak zel a ni. Kan chetthat tluan chhan thildang ni lovin kan thawhrim vang a ni.” tiin a sawi.
Hetihlai hian Brugge manager Scott Parker chuan an result avangin a hma hun a hriat loh thu a sawi a. December thla a lakluh a nih hnuah vawi hnih chiah a hnuaiah an la chak.