Graham Potter-a’n Chelsea manager a nih chhunga a zan duhawm ber tih ngam a hmang a. First leg-ah tlawm tawh mahse an mamawh result neiin UEFA Champions League quarter-final an lut.
Blues hi first leg-ah Westfalenstadion-ah 1-0 in an tlawm tawh. Tun Thawhlehni zanah Stamford Bridge-ah 2-0 a hnehna an chan avangin 2-1 aggregate in an tlang.
Potter-a Chelsea chu
London club hlunin season hautak an hmang a, beisei angin thil a kal lo tih a chiang.
Season tirah neitu thar hnuaiah coach an ban. A thlaktu atana an lak Graham Potter hnuaiah chak hmel hmuh an harsat.
Neitupa Todd Boehly-a’n sum hmathehin hlawhtlinna lei tum mahse an tum angin thil a kal lo. An squad a tawt a, player lakluh nan sum a seng hnem.
Player tha rual kawl mahse result in a zir miau loh chuan coach chungah mawhphurhna a tla fo. Potter hian Chelsea ang club enkawl turin theihna bakah mize hrawl a nei em tih zawhna thlengin a awm.
A hun takah, tun season a an tana inkhel langsar berah ngei Chelsea in zawhna awm an chhanglet. Hnehna chan phu zawk an ni a, inkhel tan tir lamah goal khung ngeina tur remchang bawhpelh nual mahse nidanga an tih theih loh an mamawh goal an khung thei.
Minute 43-naah vanneih phu a inkhel zawkin vanneihna an tawng. Forward Raheem Sterling chuan a huntha neihah ball pet fuh chiah lo mahse Dortmund keeper Alexander Meyer goal-ah a lut tho.
Inkhel tichiangtu goal erawh second half-ah a lut a, sawi zui a hlawh.
Dortmund in Marius Wolf handball vangin penalty an chawi a, VAR hmanga endik hnua pek a nih avangin an lawm lo. An lawm lohna belhchhah turin Kai Havertz chuan goal ban a pet per a, mahse a pet hma in penalty area chhunga lut an awm avangin pet nawn tir leh a ni. A vawi hnihnaah a pet goal.
Kawl a eng tan?
Tun kartawpah Leeds United lakah hnehna pawimawh an sual chhuak tawh. Hei hian Dortmund laka an chak leh hnuah hian Blues fans te tan beiseina a siam ang.
An lawmna belhchhah turin hliam vanga chhawr tam theih loh Reece James leh Ben Chilwell te an kheltha a, an dam that chuan anni hi team hlauhawmna an ni. Defender Marc Cucurella pawh tlarhnung a pathum zinga veilamah khelhtir niin a theihna sang hmuh tur a awm.
Potter chuan inkhel zawhah, “Player-te an fakawm a, chutiang bawkin kan fans te thawm pawh a tha. Hnehna chan a, Champions League quarter-final luh hi ka tan zan duhawm zing ami a ni.Team che tha lai lakah kan theihna kan lantir a ngai a, a tlang phu zawk chu kan ni.” a ti.