Central Reserve Police Force (CRPF)-a hmeichhe 85 zette chuan bike-in km 1,848-a thui inkhalhin Delhi atangin Left Wing Extremism tamna, Chhattisgarh thleng kawng an zawh dawn.
“Ni 16 chhungin km 1,848 zet kan tuam dawn a, bullet hi bike rit tak ni mah se chona thar hmachhawn hi nuam kan ti a ni,” tiin Muzaffarpur, Uttar Pradesh atanga tel tur, Anjilee chuan a sawi.
March 9-ah India Gate atanga chhuakin Chhatisgarh-a Bastar chhim lam, Jagdalpur-ah March 25-ah a tawp an khar ang.
“Bike ka chuan hian shakti ang maia thiltitheiah ka inngai thin a. Tumah ka hlau ngai lo va, ka hah ngai lo bawk,” tiin sikul a kai lai atanga bike khalh tawh Anjilee chuan a sawi.
“Bullet hi a rit a, km 1,800 chuang kan tlan dawn a. Kan thawhpui mipate hian kan theih leh theih loh min zawt thin a, ‘aw’ tiin ka chhang,” tiin officer pakhat, Asha Devi chuan a sawi.
Heng hmeichhe rualte hi ram chhung hmun hrang hranga mite an ni hlawm a. “Kan team-a telte hian India peng hrang hrang ai kan awh niin ka ngai,” a ti.
Ruahman dan chuan Delhi atangin Agra an pan ang a, Gwalior, Shivpuri, Bhopal, Nagpur, Raipur kalin Jagdalpur an thleng dawn a ni.
An zinga naupang ber tur, Tripura atanga tel, Kavita-i chuan, “Bike ka khalh hian inrintawkna ka nei a, rual u zawkten min hrilh thin angin, ‘hlauhna hi taksaah ni lovin rilru lam’ an ti a chu chu tute pawhin kal khum a ngai thin,” a ti.
CRPF hian 84th Raising Day chu March 25 hian Jagdalpur-ah Amit Shah-a hova hman an tum a. LWE tamna laia an hman hmasak ber tur a ni.
Nikum khan an din champha hi Jammu-ah an lo hmang tawh bawk.