Aizawl: India rama Roman Catholic leh Protestant kohhran hrang hrang hmeichhe pawl, Indian Christian Women’s Movement (ICWM), Mizoram Unit; Association of Theologically Trained Women of India (ATTWI), Mizoram Branch leh Magdalene Society, Mizoram te bul tumin International Women’s Day lawmna nimin khan J.M Lloyd hall, Synod Office Mission veng-ah neih a ni.
International Women’s Day hmanna hi hun hnihah then niin, chawhma lam hun hi Lalpianthangi Hrahsel, President, ICWM-in kaihruaiin, Dr Lalrinawmi Ralte leh Dr Zohmangaihi Rokhum te hnen atangin International Women’s Day 2023 campaign thupui, ‘Embrace Equity’ tih hmangin thusawi a ni.
Chawhnu lamah Sikulpuikawnah hun hman chhunzawm a ni a. He hun an hman hi ‘Women in Black’ tia vuah a ni a, hei hian a tum ber chu inrikrapna leh tharum thawhna kawng hrang hrang do chunga mi zawng zawng tana ram leh khawtlang muanawm siam tura tanrual a ni.
‘Women in Black’ hunah thawmhnaw dum inbelin hmeichhiate chawikanna lam thu leh tharum thawhna hrang hrang dona thuziakte kengin hun hman a ni.