Aizawl: Thawhlehni zan khan Lalpa Chhiahhlawh Intelkhawm chuan kumin MLA inthlanpui lo awm tura an pawl aiawha ding tur mi panga an puang.
Kum 2023 Mizoram inthlanpuia Lalpa Chhiahhlawh Intelkhawm pawl aiawha ding tur an puante chu Hrangtuzo bialah Rev. Dr. Zaichhawna Hlawndo, Aizawl North I-ah Lalruatfeli Hlawndo, Thorang bialah Upa K. Lalrimawia, Lunglei South-ah T Upa ZD. Dengngura leh bial la tar lan loh Upa H. Biaklawma te an ni.
Thu sawiin Rev. Dr. Zaichhawna Hlawndo chuan Lalpa chhiahhlawh tura mi inpe ngam an awm chu lawmawm a tih thu a sawi a. “Lalpan a pianna ramah missionary tura kir tura a tih chhan ber rorelna siam that chu a takin a lo din ngei ka beisei a. Nehemia hova Jerusalem kulh chim din that leh a nih angin kan ram leh hnam tlu chhe mek tung dinga siam tha turin theihtawp kan chhuah zel dawn,” a ti.
Thuchhuah an siam danin Pathian Lal Ram sorkar tana ding tur Lalpa Chhiahhlawh Intelkhawmte puanna leh hlanna hun hi April thla hun remchang hmasa berah neih leh tur a ni dawn a. June thla ral hmain Lalpa Chhiahhlawh Intelkhawm mi 40 te hi puan fel hman an beisei thu an sawi.