Thla hmasaa lirnghingin Turkey a sawia thil chhiat zawng zawng chu $ tluklehdingawn 100 chuang hu a nih thu United Nations Development Programme (UNDP) thuneituin a sawi a, hei hi karleha donor conference neih tur hmaa a sawi a ni.
“Vawiin thlenga sorkar leh ram dang mi an thawhpuiten an chht dan chuan $ tluklehdingawn 100 hu zet thil a chhia,” tiin UNDP hotu, Louisa Vinton chuan lirnghingin nasa taka a sawi chhiat, Turkey-a Gaziantep khawpui atanga thuthar lakhawmtute a kawmnaah a sawi.
February 6-a Turkey chhim leh Syria hmarthlang lama chhiatna thlengah hian mi 52,000 chuang an thi a. Mi tam tak chu an mut tur laia in chimin a chhilh an ni.
Thil chhe hlut zawng an chhut hi Turkey huam china mi chauh a la nih thu Vinton-i chuan a sawi a, he an chhut hi March 16-a Brussels khawpuia a dam chhuakte puihna tur leh chhia siam that lehna tura vehbur khawn huaihawt tur atana an chhutna a nih thu a sawi bawk.
A hmain World Bank chuan Turkey-a thil chhe hlut zawng hi $ tluklehdingawn 34.2 vel a nih tur thu a lo sawi tawh a; mahse, Vinton-i chuan tun din lehna leh siam that lehna man tur hi chu ai chuan a san dawn bakah Turkey-in sum a thawh chhuah na taka nghawngin an eibar dinhmun thlengin a hniam phah dawn a, chu chu an chhut tel tih a sawi a ni.
Vinton-i chuan Turkish sorkar hian UNDP, World Bank leh European Union nena tanghova an chhutnaah chuan a sang zawk hle tih a sawi.
Chhutna hi peih fel a nih hnuah chumi behchhan hian karleha donor conference-ah tun dinna leh puihna tura mamawh pharh a ni dawn tih a sawi bawk.
Din chhuah lehna atana tul, in sak dan tihchangtlunna leh khualrel tichhe lo zawnga insiam that lehna tur zawng zawng nen chuan, ‘tuna chhut hi a pel daih dawn’ niin a sawi bawk.
Vinton-i chuan Turkey-a a tuar na ber, Hatay province-ah chuan in sang tel chhiain ‘a rapthlak tak zet’ tih a sawi a. “An mamawh a tam em em rualin an mamawh tak a vâng si,” a ti.