Mizoram Pradesh Congress Committee (MPCC) President Lalsawta chuan Lunglei Municipal Council (LMC) inthlan lo awm tura an party aiawha ding turte chu ramin a kohna a nat em avanga candidate atana an sawmna pawm an nih thu a sawi.
March 29, 2023 hian LMC inthlan hmasa ber neih a ni dawn a. Congress party chuan ward awm zawng zawng 11 an chuh dawn a, MPCC president-in an party aiawha ding turte Congress Bhawan, Lunglei-ah a puang.
Candidate puanna leh mi thar lawm luh inkhawmah Lalsawta hian, “Congress party candidate turte chu he ramin min ko a ni tih an pawm avanga candidate pawm an ni a. He ramin a kohna hi a na em a ni,” a ti a, candidate-te chu sawisel an tawk dawn sawiin, nasa zawka tan la sauh zawk turin a chah.
Congress party president hian thuneihna insemzai hi Congress party chuan tha a tih thu a sawi a. Lungleia tihtheih reng Aizawla kal fo a ngaite hi thuneihna semzai loh vang a nih thu a sawi a. Lunglei by-pass road siamna tur Congress-in a dah tawh hmun danga sum pawhpen a nite hi lungchhiahthlak a tih thu a sawi a. Lunglei tan tui hnianghnar zawk ngaihtuah a tul thu te, Lungleiah sorkar hnathawk hna kawptir tam lutuk avanga harsatnate ching fel tur hian LMC inthlana Congress candidate-te chu an tu leh fate tan vote theuh turin Lunglei mipui a sawm.
Lunglei District Congress Committee (LDCC) President KL Chhawnzauva kaihhruai inkhawmah hian MPCC president-in mi thar a lawm luh bakah MPCC Vice President Lal Thanzara pawhin thu a sawi ve bawk.
Congress party candidate turte:
Ward No1 : V. Lalhlimzauva
Ward No 2 : Lalramzauvi Chawngthu
Ward No 3 : K Lalsangpuia
Ward No 4 : Joseph R.Lalremngheta
Ward No 5 : Lalenkawli Pautu
Ward No 6 : C. Lalnunsanga
Ward No 7 : P.C.Thanzama
Ward No 8 : Elizabeth Vaninmawii
Ward No 9 : C.Z. Lalhmingmuana
Ward No 10 : Lalthanzauvi
Ward No 11 : H. Lalnunmawia