Aizawl : Mizoram State Sports Council (MSSC) Sports Complex, Muallungthu-a sorkar laipui atanga sum hmuh Rs nuai 500 senga phullem phah khelmual siam chu thawhlehni khan Sports Minister Robert Romawia Royte-in a hawng a. Holiday Sport buatsaih tura Sports department-in hma a lak mek thu a sawi.
Sports Minister chuan “Holiday hi zirlai naupang leh thalai ten phone khawih nan an hmang nasa a, hei hian an rilru leh taksa hriselna nasa takin a tihniam” tiin, Holiday Sport buatsaih a nih chuan naupang, thalai, nu leh pa ten khelmualah taksa sawizawiin hun tam zawk an hmang thin ang a, chu chuan an rilru leh taksa hriselna nasa takin a puih theih tur thu a sawi bawk.
Ei leh bara intodelh tur leh thil siam tam zawk dekchhuak turin hriselna tha a pawimawh thu leh mipuiin rilru leh taksa hrisel an neihna tura Sports department-in hma a lak thu pawh Sports Minister chuan a sawi a. Infiamna chi khat mai ni lo, infiamna chi hrang hrang te tihmasawn tura hmalak a nih thu a sawi.
MSSC Sports Complex, Muallungthu-a Synthetic turf football ground hi sorkar laipuia Ministry of Youth Affairs & Sports hnuaia Khelo India scheme sum hmuh Rs. nuai 500 hmanga ACT Global company, USA-in an siam a nih tuh sorkar thuchhuahin a tarlang a. Phullem phah, bakah a hungna leh pavilion leh paver block footpath te siam tel a nih thu a tarlang bawk.