Afghanistan hmar lam, Balkh province-a Taliban governor chu a pisaa bomb tihpuah hmangin Ningani khan thah a ni.
Mohammad Dawood Muzammil hi kum 2021-a Taliban-in thuneihna an chan leh hnua sorkar thuneitu thah zinga dinhmun sang ber a ni.
Taliban-ten Afghanistan-a ro an rel leh hnuah hian tharum thawhna a tlem sawt hle tawh a; mahse, Taliban tantuten beihna an tawk fo thin.
Tual chhung police-te chuan Ningania thil puak hi eng nge a nih an la sawi chiang thei lo va, eng pawl mahin an tihah an la chhal lo bawk.
Hetih lai hian Taliban thupuangtu, Zabihullah Mujahid chuan governor hi ‘Islam hmelmaten thil an tihpuah hmangin a martar’ tiin Twitter-ah a tar lang a. Chhui mek a nih thu a sawi bawk.
Muzammil-a hi khawchhak lama Nangarhar province-a governor a nih laiin Islamic State helho beihnaa thawkhlawk tak a ni a, October thla maiah khan Balkh-ah hian sawn a ni.
Police chuan mi dang pakhat thi a awm bawk niin an sawi a, mi dang tam takin hliam an tuar bawk niin an sawi a. Thihchilha beihna nia sawi a awm bawk.
Tun hnai lawk khan Balkh province khawpui, Mazar-e Sharif-ah province thuneitute chuan ‘hel leh mi ru botu’ mi pariat thah an nih thu a puang a. Eng hel pawl nge an nih erawh an sawi lo va, he thil puan hnu lawkah governor chu thah zui a ni ve ta a ni.