Bayern Munich in Europe huap inelna lian UEFA Champions League quarter-final lut turin harsatna lian an nei lova, French club Paris Saint-Germain chu round of 16-ah tawlhthluk tir lehin 2-0 in hnehna an chang.
Nilaini zana UCL round of 16 second leg inkhelah Allianz Arena-ah Paris Saint-Germain in goal an khung thei lova, first leg a 1-0 a tlawm tawh PSG hi 3-0 aggregate in an tlawm.
FC Hollywood an tha
German champion lai hi European football-ah team hlun an ni a, kum 1970 chho vel phei kha chuan player tha rual awmkhawmna an ni a, an team an that em avangin FC Hollywood tia hminglem vuah an ni.
Tun dinhmunah Bayern hian squad siksawi ngai leh thin mahse team tha tak an indin leh mek tih an lantir a. An mikhual, sum tam tak senga star player rual remkhawm PSG lakah harsatna an nei lo.
Vawi ruk European champion ni tawh Bayern in first leg a goal khat a hmahruai an ni a, first half-ah PSG tlarhma a Kylian Mbappe leh Lionel Messi te inkawp chu an veng uluk.
PSG tlarhma in buaina lian erawh an siam thei lo. Bayern player-ten an vil hneh a, taima leh huaisen taka football khelin an tih tur an ti thlap thlap.
Vawikhat chetsual teuh an nei a, goalkeeper Yann Sommer chu Achraf Hakimi in ball chhuhsakin midfielder Vitinha chuan goal ruak a khung thei a ni a, Bayern defender Matthijs de Ligt chuan a team a chhanhim hlauh.
Minute 61-naah Bayern Munich tan striker Eric Maxim Choupo-Moting chuan a club hlui lakah goal hmasa zawk a khung a. Huntawp dawnah substitute Serge Gnabry chuan an goal hnihna a khung.
Paris khaw club hian goal chhuah belh an hnaih hle a. VAR thutlukna avang leh offside flag vangin Choupo-Moting goal khung leh huntawp dawnah Sadio Mane goal khung te pawm loh a ni zawk.
PSG hi tunhnai season sarih chhungin kumin hi round of 16 an paltlang theih loh tum nga na a ni a. Ligue 1 hmahruaitu ni mek hian Europe-ah beisei an phak loh avangin head coach Christophe Galtier chungah ‘pressure’ a awm tan niin an ngai.
Inkhel zawh lam
Bayern head coach Julian Nagelsmann chuan, “Second half-ah dawhtheihna nen football kan khel. Ball kan chhuhsak tumna laiah tak kan hlawhtling thin a, ball kan chanin kan hmang tha zawk. Team tha zawk kan ni tih inkhelah a chiang a, chak kha kan phu zawk a ni.”
“Tumna tak tak leh tanrualna kan lantir a, PSG lakah chuan hei hi a pawimawh hle.” a ti bawk.
PSG coach Galtier chuan, “Kan huntha neih a goal kan khung lo kan tuar. First half-ah kan intluk viau a, goal khung hmasa ni ila result a danglam ngei ka ring.” a ti.