Aizawl: Larsap Hari Babu Kambhampati chuan TB natna veiten chaw tha an dawn theih nan nasa leh zuala pen chhuak turin Mizoram mipuite a sawm.
Nimin khan sorkar laipui hnuaia Ministry of Health & Family Welfare, National Consultant, D. Dharma Rao chuan a chenna, Raj Bhavan-ah larsap a tlawh a, PM TB Mukh Bharat Abhiyan hnuaia Mizoram chhunga hmalakna kal mek a hrilhfiah.
An inkawmnaah larsap chuan, “Mizoram chu kan la vannei a, TB vei pawh mi 1,000 chuang vel chiah kan la nih avangin tan lak deuh chuan TB vei ei leh in tha mamawhtu zawng zawngte hi kan pui vek theih a rinawm a. MLA-te leh mipui aiawh thlan tlin zawng zawngte, college leh sorkar hnathawk dangte pawh he rawngbawlna huangah hian rawn lut zel turin ka ngen nawn leh a ni,” a ti.
He huna tar lan a nih danin Mizoramah hian TB natna vei enkawl mek mi 1,321 an awm a. Heng damlo zinga mi 989-te hian chaw tha leina atana tanpuina an mamawh a. Vawiin thlenga TB natna veite tanpuina atana Nikhshay Mitra program kaltlanga sum thawhtute hi mi 400 an awm mek bawk.
Larsap hian TB vei mi 20 tan an chaw tha leina tur pawisa a thawh mek a. Ram hruaitu zingah Health Minister Dr. R.Lalthangliana, Home Minister Lalchamliana, MLA pahnih Er. H. Lalzirliana leh Dr. K.Beichhua te pawhin an thawh mek bawk a. LADC leh MADC hotute zingah pawh he rawngbawlna a tel an awm nual a. Sorkar hnathawk zingah chuan doctor an la tam ber rih a ni.