Aizawl: March 29, 2023-a Lunglei Municipal Council (LMC) inthlan lo awm tur atan nimin khan political party pathum – Mizo National Front (MNF), Zoram Peoples Movement (ZPM) leh Bharatiya Janata Party (BJP), Mizoram State ten candidate tur an puang.
Rorel lai, MNF party aiawha LMC inthlana chuh turte hi an vice president, Lalthlengliana’n Lunglei Saikuti Hall-ah a puang a. MNF Adviser Dr R Lalthangliana chuan thu sawiin, LMC chu Lunglei khawpui mipui tana rotling, malsawmna tinreng kengtu tur niin ro phum ruk haichhuahna tur a nih thu a sawi.
LMC inthlana MNF candidate turte hi Lunglei khawpui tana mi thiam leh tha thlan khawm, kohhran leh khawtlang tan pawha mi tangkai, party dang tan pawh zam phah rum rumna tur an nih thu a sawi.
Dr R Lalthangliana hian MNF sorkar hmasak kum 2007 khan LMC hi Assembly House-ah pass a lo nih tawh thu sawiin, kum 2008 MLA inthlanah MNF an tlak tak avanga hun rei tak a taka kalpui theih loh hnuah tuna a lo hlawhtlin tak avangin lawmawm a tih thu a sawi.
“Tuna candidate, a sulsutute hi Lunglei khawpui hmasawnna tura ngaihtuahna hmang thiam tur an nih avangin mipuiin an thlan tlin ngei chu an mawh a ni. LMC hringtu leh dintu ngei MNF LMC candidate-te lo thlang tling u la, Lunglei khawpui hian in tangkaipui hle dawn a ni,” a ti.
ZPM party aiawha candidate turte hi ZPM Southern Hqrs., Lunglei President Lalrinpuii’n tawlhloh puan a bahtir hnuin Working President K.Sapdanga’n a puang.
ZPM Southern Hqrs., Office, Venglai Lungleiah candidate tur puan chhuahna inkhawmah thu sawiin K Sapdanga hian sum leh pai leh therhlo engmah tawktar tur an nei ve lo chung pawha thalai lehkhathiam leh hma lam hun êng tak tak, Lunglei khawpui hmangaihna rilru pua candidate atana an pen chhuak chu lawmawm a tih thu a sawi.
Candidate turte chu ZPM party thil tum hrang hrangte an tihhlawhtlin ngei a rin thu leh, chumi tur pawh chuan an lakah Lunglei mipuite pawhin beisei sang tak an nei niin a sawi.
K Sapdanga hian ram leh hnam ei chhetu ber chu ei rukna a nih thu sawiin, “A te ber atanga a lian ber thlengin ei rukna hi kan do tlat tur a ni. Mi tha tak tak nia kan ngaih, kan ram rorelna inpuia thu tura kan thlan tlinte pawh ei rukna leh hlemhletna avangin mi chhe berah an chhuak mek zel a, a pawi em em a ni,” tia sawiin, LMC candidate atana ZPM party-in an puan chhuahte hi chu ei rukna leh hlemhletna lakah pawh fihlim tlat tura an beisei thu a sawi bawk.
BJP Mizoram State pawhin Aizawl Republic venga an pisa-ah thu thar thehdarhtute hmaah Vice President R Vanramchhuanga’n a puang.
R Vanramchhuanga chuan BJP Mizoram State aiawha LMC inthlan chuh turte chu Lunglei khawpuia chengte tan kawng tinrenga hmasawnna thlentu an nih ngei a beisei thu a sawi a. Candidate-te an thlan tlin chuan a rang thei ang berin Union Housing & Urban Affairs Minister Hardeep Singh Puri chu Lungleiah chah chhuaka mipuite mamawh chu LMC member-ten an thlen dawn niin a sawi.
LMC Inthlan: Party Pathum Candidate
WARD MNF ZPM BJP
No I R. Lalhmingmawia Lalhruaitluangi Sailo K.H. Lalrotlinga
No II Laldingngheti Pautu Lalrempuii Renthlei Lalremsangi
No III F. Lalsawmkima Lalzuithanga Lalramhluna
No IV Zoramdina Ralte R. Lalramzauva Lalzarmawia
No V T. Vanlallawmi Zonunmawii Lalmuanpuii
No VI LH Lianzama Lalremsiama H. Lalhmingliana
No VII Lalrotluanga Ngente K. Lalrinawma Vanlalthanga
No VIII C. Lalrindiki K. Lalmalsawmi R. Lalmalsawmi
No IX Lalngaihawma Pachuau Zorinsanga Hmar Z.D. Ramdinpuia
No X C. Vanlalthangi Judy Lalhriatpuii Laltanpuii
No XI ZD Ngurlianchhunga Vanlalliana Pachuau Vanlalhruaia