- Ruata
Mahindra & Mahindra chuan February thla chhung khan lirthei 30,358 an hralh chhuak a, nikum February thla kha chuan 27,663 an hralh thung a. Nikum February thla nena khaikhina a punna hi zaa 10 a ni. Heng Mahindra SUV hralhchhuah zinga an hralh tam zual 4 te han en dawn ila.
MAHINDRA BOLERO
Mahindra Bolero hi February 2023 khan Mahindra SUV hralh hnem ber a ni a, Mahindra hian Bolero hi 9,782 an hralhchhuak a, nikum February thla chhung khan 11,045 a hralh chhuak thung a. Chumi awmzia chu a hralhna chu zaa 11-in a tlahniam tihna a ni a. Bolero hi 75bhp, 1.5L diesel engine hmang a ni a, a chhuak thar Bolero Neo hian 100bhp, 1.5L diesel motor a hmang thung a ni. Mahindra Company hian ram chhungah seat 7 leh 9 awm Mahindra Bolero Neo Plus chu a tlangzarh thuai dawn a ni. Mahindra Bolero hi Mizoramah pawh lei tam pawl tak a ni a, mimal leh sorkar anga lirthei hman tam pawl tak a ni mek a, hralh pawh a kal viau a ni.
MAHINDRA SCORPIO
Thla hmasa khan Mahindra hian Scorpio SUV 6,950 (Scorpio N leh Scorpio Classic telin) an hralh a. Nikum February khan 2,610 hralh chhuah a ni thung a, hetih lai nena khaikhin chuan Scorpio hralh zat hi 166% zetin a pung a ni. Tunah hian Mahindra Scorpio N-ah hian 203bhp, 2.0L turbo petrol leh 132bhp/175bhp, 2.2L diesel engine te duhthlan tur a awm a. Scorpio Classic chuan 132bhp, 2.2L turbo diesel engine a hmang thung a, 6-speed manual gearbox a nei a ni. Scorpio pawh hi a thar an lei tam ang bawk hian, a design hlui, Scorpio Classic tih hmingpua chhuak hian lei a hlawh chho mek tho a. He SUV hi chuan chuai lam a la pan meuh lo a tih theih awm e.
MAHINDRA THAR
Mahindra Thar hi February thla khan 5,004 hralh niin thla hmasaa Mahindra SUV hralh hnem ber pathumna a ni a, mahse February 2022 nena khaikhin chuan a hralhna chu zaa 1-in a tlahniam a ni. Mahindra Thar hian 2.0L, 4-cylinder turbo petrol khawl leh 2.2L, 4-cylinder turbo diesel khawl te a hmang a. Lifestyle SUV a nihnaah hian hman tangkai dan tur te leh bungraw phurh duh zat te ngaihtuahin mi zawng zawng tan a ni lem lo a, hetihrual hian lirthei hralh tam tak leh leitu ngah a ni reng tho a, offroad adventure ngainatute tan phei chuan lirthei lei hlawh tak a ni awm e.
MAHINDRA XUV700
Mahindra hian XUV700 hi 4,505 an hralh a, February 2022 khan 4,138 a hralh a, YoY-ah zaa 9-in a hralhna a pung a ni. Mahindra XUV700 hian 200bhp, 2.0L turbo petrol leh 155bhp/185bhp, 2.2L turbo diesel engine te a nei a. He SUV hi a elpuite zingah chuan a changkang pawl leh hmanraw tunlai ber bera thawm nasat pawl a ni a. A man erawh a tam deuh avangin lirthei man tlawm leitu tam tlur ang kha chu a ni thei lo a. Mahindra XUV 700 hi chu SUV lian tha, changkang bawk si, mawi bawk si duh tana thlan ngei tur SUV tha leh changkang a ni a. Market lamah pawh a che chhe lo chho zel a ni.