Mizoram sorkarin Joint Electricity Regulatory Commission (JERC) Manipur & Mizoram hnenah kum 2023-24 atana hman turin power tariff ennawn leh tuna hman lai atanga 3.5%-a tihsan rawtna a thlen.
JERC hotuten The Zozam Times an hrilh danin Power & electricity department chuan January 18 khan JERC-ah hian rawtna an thlen a, sorkar kum thar 2023-24 atan êng chhit man chu 3.15%-a tihsan an rawt.
He rawtna anga tihsan a nih chuan subsidise hnuah unit khat Rs 8.08 a ni dawn a, tuna tariff hman lai mekah chuan êng chhit man hi unit 1 man hi Rs 7.83 a ni mek thung.
JERC hotute chuan kawlphetha chhin man chu kum tin ennawn a nih thin thu te, sorkarin rawtna a thlen chungchang sawihona hun (public hearing) an buatsaih thin thu leh tariff ennawn chungchanga sawiselna leh rawtna awmte thlir chungin tariff thar an siam thin tih an sawi.
Tun tuma kawlphetha hman man ennawn tura rawtna lut chungchang sawihona hun chu March 22-ah Aijal Club-ah an buatsaih leh dawn tih an sawi bawk.
Mizoram sorkar chuan nikum khan sorkar kum kal mek, 2022-23 chhunga kawlphetha man hman atan zaa 21.05-a tihsan a rawt a, JERC chuan sorkar rawtna anga kalpui loin 6.78%-a tihsan a ni ta zawk a ni.