Aizawl: Congress Thalai, MPYCC President Dr. Lalmalsawma’n nimin khan a piancham pha phak pualin Gilead Special School, Brigade, Bawngkawn, Aizawl tlawhin thilpek a hlan.
MPYCC President hian Gilead Special School tanpuina sum fai a hlan bakah, zirlai naupang zinga harsa zual pahnih hnenah kum khat atan hostel leh school luhna a tum sak.
Gilead Special School Principal Laldinpuii hnena a piancham pual thilpek a hlannaah hian Dr. Lalmalsawma chuan, Congress Party Manifesto ‘Tang Puihna’-ah vohbikte an lo him a, an dinhmun a lo that zawkna turin special social security ngaihtuahsak an nih tur thu a sawi a. “Vohbikte hi kan ram tan mi tangkai an ni thei tih ka hrechiang a, an tan hian ruahmanna tha zawk kan duang a, dinhmun tha leh him zawk, anmahni chawikan zelna tur ruahman a ni ang. An tan hian fel fai takin hmalakna tur kan duang a ni,” a ti.
Dr. Lalmalsawma hian, vohbikte enkawl kawngah Spastic Society of Mizoram hnathawh hi a ropuiin an inpeknaah ropui a tih thu sawiin, “Vohbik kan tih te hi an enkawlna hnuaiah kan ram tan mi chhenfakawm, kohhran leh khawtlang tan a mi tangkai tam tak an chher chhuak thei hi a lawmawm hle a ni,” a ti bawk.