India leh Australia prime minister-te chuan cricket hmanga inkungkaihna tilangin Ahmedabad khawpuia Narendra Modi hmingchawia khelmualah an ramten test cricket khel bul an tanpui.
Prime Minister Anthony Albanese hi Indian Prime Minister Modi hian Ningani khan khelmualah hian dawngsawngin national emblem-te chu ram hnih team captain, Steve Smith leh Rohit Sharma hnenah an hlan.
Prime minister pahnihte hian cricket entu sang tel chu khelmual chhungah fang kualin inkhel bul tan lai an endun a ni.
Modi leh Albanese hian an ramte cricket-a an lo inhmachhawn tawh dan hrang hrang tar lanna photo exhibition chu an en kual dun bawk.
Cricket-a India-Australia inhalna hi khawvela a nasa ber pawl niin England leh Australia ramten an khelh thin Ashes test series nena khaikhin hial a ni.
Eptu, Congress party chuan ama hmingchawi khelmuala Modi-a a inlan chu nasa takin an sawisel.
An hruaitu, Jairam Ramesh chuan, “I hming chawia khelmual siamah nangmah ngei i inlan chu mahni ngei intihlansarh tumna lian tak a ni,” tiin Twitter-ah a tar lang.
Albanese-a hi Nilaini khan Modi-a chawr chhuahna state, Gujarat-a khawpui pawimawh ber pakhat, Ahmedabad thlengin India-ah hian ni li a châm dawn a ni.
India-in zalenna a sual laia hruaitu, Mahatma Gandhi zahna chu a lo khawsak tawhna thin, Sabarmati Ashram-ah a hlan dawn a. Zan lamah governor chenna inah Holi kût lawmna chi khat a hmanpui bawk.
Ningani zan reiah Mumbai a pan ang a, India-in ama kutkawiha aircraft carrier a siam, INS Vikrant a en dawn a, thlawhna phurhna lawng lian hi September thla khan Indian Navy hman tura hlan fel a ni tawh.
Zirtawpniah ram pahnih hruaitute hi New Delhi-ah an inkawm ang.
India a pan hma lawkin Perth khawpuiah Albanese chuan, “Australia leh India inkungkaihna hi a pawimawh tak zet,” a ti a. “Hlutna tam tak kan intawm a, mipui rorelna ram kan ni a, eibara kan inkungkaihna tihlen zel duh ve ve kan ni,” a ti.
India chu Indonesia nen khawvela economy lian pathumna leh palinaah an kai dawn tih sawiin, “Hei hi Australia tan remchanna tha tak a ni,” a ti.
India hian kum 2021 chhung khan Australia hnenah bungrua $ tluklehdingawn 8.3 man zet thawn lutin $ tluklehdingawn 16.75 man a la lut thung niin economic think tank Global Trade Research Initiative chuan a sawi.
India-a a thawn chhuahte hi agriculture, puanthan leh railway engine atanga telecom lam thil niin Australia atanga a lak luh zinga 95% ze chu Indian industry-ten an mamawh raw material leh mining product a ni thung.
Ram pahnih hruaitute hian ‘Indo-Pacific-a zalen, inhawng tak a awm theih’ an duh ve ve a. Quad an tih, Australia, India, Japan leh United States ram tangrualten Asia-a China inzar pharh zel tur danchah an tumna pawh an thu lian zinga mi a ni.