- Rosangzela, Vh (8974138026)
Kumin kawmtawp lam a inthlang tur kan ni bawk a, party lam pawhin thu leh hla an ngah chho ta malh malh hle a. Ram veitute pawh kan pung chho viau mai a, social media ah pawh thu hrawpui pui hmangin kan au chhuak mek a ni. Rorelna dik duhtu inti te rawn chhuakin ni 15.02.23 khan Hotel Regency ah chanchinbu mite an ko kal hial a nih kha, ram an vei thu uar takin an tarlang a. Anni ho hi pensioner rual an nih hmel viau mai a, pensioner la valai leh mahni tawka theihna lian tak nei ni a in hria engngemawzat hi an awm ve hrim hrim a. Sorkar emaw Kohhranin a chhawr lai a officer pawimawh tak leh lal tak mahse an pension hnu a tu khaw kha in an ngaihsan zui lem loh an ni ve bawk a. An service lai khan huaisen takin ram hi lo vei thin se tha tur, engmah tih theih tawh loh hnuah awm mai mai hreh si mahni tawka pawimawh leh fing riau a in ngai chungin pawl hrang hrangah telin ram an vei a. Political Party leh pawl thenkhat hian an pawl cheimawi na atan an duh a, an mamawh dan chu “ necessary evil “ ang hi a ni. Ram hi kan vei takzet anih chuan kalsan ngai, chan ngai hi a awm a, chan ngam silo duhtawka in sawh muk hnuah ram kan vei thin hi a thawk na tawh lo a ni. Hetiang hi kan ram kalphungah a bet nghet tlat a, pensioner sum ngah vanglai hi Party lam hian an hmu chat chat a ; an sawm hliam hliam a, candidate ticket an sih hmuha chutah chanchinthara lang ngei turin an lawmlut a beidawnna a in mung chho tan ta a ni. Sorkar leh Kohhran in a chhawrfe tawh, tapchhak zawl belh ngawt ai ah ti a MLA Candidate beisei tute hi ramin a mamawh lo.
Assembly House kawtah sawn traffic a jam a, traffic jam awm tawh lohna khawpui min tiamtu chu sorkar officer rual ten hmanhmawh phili in an rawn escort a. Traffic jam a tang te chu kan nui deuh tut tut in ka hria, khawtlangah pawh miin an zah der ve em em sorkar officer lian ten dawt bawm an rawn buaipui chiam mai chu two wheeler khalh tleirawl thenkhat in sum theilo chu an nui ri hak hak a ni. Ram dangah chuan an ram hruaituten mipui zahtlakin ram an hruai a, chuvangin an zahin pathian biak takin an bia a ni. Vanduaithlak takin kan ramah chuan ram hruaitute hi kan nuihzat tlat a ni, a pawi hle a ni. Tun tum Assembly House a kan MLA te rorel dan kan hmuin kan hria a, a sawhkhawk chu mipuiin kan zahpui a ni. Ram hmasawnna tur a sum ruahmanna tha kan lo beisei laiin, kan beisei ang kan hmu lo. Inhnialna awmze neilo, ram tundinna tur a thu inchuh awm mang silovin a ho thei ang berin kan nui hluah hluah mai a ni. Thutak a ram luhpui tum lo, a tenawm thei ang berin ram kan kalpui chu a ni ber e. MLA rual ram hmasawnna kailawn a mipui kaipui ngaihna hre lo, hawi a mai mai te hi kan mamawh tawh lo. Kumin inthlanah rawn in candidate tawh lo sela, mamawh loh candidate te hi mipuiin advance takin kan hnawl mek a ni.
Vantlang titi ah zaithiam lar pakhat sum tel lova ram develop dan hria a awm a ni awm e, kumin MLA inthlanah bial chuh a tum zui an ti anih chu !. A din tumna bial chu an zai dual dual mai a niang chu, ram veitute kan pung zel kan tih tawh kha. Milar nih hi kan Zoram khawvelah hi chuan thil harsa lutuk a ni awm love, han lar hluai te pawh hi an tam mai. Heng milarte hi ramin MLA atan a mamawh teh chiam lo, YMA hruaitu lar tak tak MLA ni zui ta mahse an thawhhlawkna sawitur awm mang lo kan neih thluah tawh hi. Kumin kan inthlang tur hi hun dang zawng aiin mipui chetvel dan ( flow ) a danglamin a hriat, mipui hian mi langsar kan melh lo. Ram tana mitak rawn dingchhuak turte kan melhin kan ngaihven mek a ni. Inthlan kum hi chuan Political Party lam hian mipui barakhaih turin tutu te emaw an rim kual a, Pathian thuhriltute pawh an rim fo mai; MLA te han ni zui ta se engnge an contribution ni ang ? Milar satliah hi kumin MLA Candidate atan ramin a mamawh lo.
He vaipa ang hi kan mamawh:
Lok Sabha leh Rajya Sabha a MP ten rorelna an kalpui dan kan hria, zahthlak takin an in bei fo thin a ni India ram hmai an ti bal tih te pawh a nih thin kha. MP te in auh buai avanga rorelna kalpui thei lova hun an khawhral chang a tam mai. Chanchinbu miten na takin MP te an khak a ni, Parliament a rorel kalpui a nih hian minute khatah cheng nuai 2.5 vel seng ral thin ang an ni a, kum 2014 a Parliament thlasik thutkhawm anih khan rorel hlei thei lovin in au buaina a thleng zut mai a, kha tih laia Biju Janata Dal MP Jai Panda khan a MP hlawh thlahnih chhung November leh December chu a la duh lo. Heti hian a sawi, “ tun tum session ah hian mipui tan hna tha ka thawk lovin ka hria, chuvangin thlahnih hlawh ka la lovang “ a ti a ni, a ni hi a hnuah BJP ah lutin hruaitu langsar tak a ni zui ta a ni. Ram roreltu mipui tana mahni inphat ngam kan ramin a mamawh, chutiang mi chu mipuiin kan dap mek a ni.