Manchester United manager Erik ten Hag chuan tun kartawpa Liverpool laka an mualpho zana sawisel hlawh tak Bruno Fernandes thlavang a hauh a. United squad-ah a player pawimawh zing ami a ni zel dawn a, captain te zingah a la tel zel dawn tih a sawi.
Anfield a 7-0 a an tlawm tumin kum 28 mi Fernandes hian khelmual chhunga a khawsak dan avangin sawisel a hlawh hle a. Team hmahruaitu atan a tha tawk lova, a tlan tam tawk lova, midangte a sawisel nasa in referee te lakah a chetdan a tha tawk lo niin sawiseilna hrang hrang a tam.
United defender hlui Gary Neville chuan United captain armband hrengtu chetdan chu zahpuiawm tiin a sawisel bawk.
Ten Hag chuan a player thlavang a hauh a, Fernandes a pawimawhna a sawi.
“Season tha tak a hmang niin ka hria a, tuna kan dinhmun a kan awm theihna chhan lian tak zing ami a ni.”
“Team-ah player-te tiphurtu leh cho chhuaktu a ni. Tumah hi famkim kan awm lova, thil tihsual te chu kan nei thin vek, mahse hei hi kan inzirna a ni. Keipawhin zir tur ka nei a, ani pawhin zir tur a nei tihna a ni mai.” a ti.
Khelmualah club captain Harry Maguire a khelh lohin captain a nih tir chhunzawm zel dawn em tih zawhna chu chhangin, “Aw, hei hi chiang takin ka sawi ang. Player fing tak, mihring tawnhriat nei tha tawh rilru fim nei a ni a. Kan player a ni hi ka lawm a, Harry khelh loh chuan ani hi captain a ni.” tiin a sawi.
United hian nizan khan Europa League round-of-16 first-leg-ah Real Betis an hmachhawn.