Aizawl: Congress party-in nimin khan Congress Bhawan-ah ‘Politics Tha’ tih thupui an zir ho.
‘Politics Tha’ tih thupui hmangin Vanneihtluanga’n zirtirin central politics-ah Congress party chu a zen thuk ber an nih thu a sawi a. Mizorama hlima lungawi mai a tawk lo nia sawiin, Mizoramah chauh ni lo, central-a politician lian leh larte bula che tla phak nih a tul tih a sawi a. “Ram rorelna hmuna budget session-ah sawiho huna sawi tur hre lo ram hruaitu duh aia tam kan nei, mipui aiawh MLA-te hriatna leh thiamna lama intuaihriam an mamawh,” a ti.
Sorkar inrelbawlna dik a pawimawh thu sawiin Vanneihtluanga chuan, “Dawt project hmangin central kan dawr a, Mizoram thlenpui rual rualin duh duha hman theih emaw kan ti. Kan data dik lo theh thlak thin hi kan tuar a ni,” tih sawiin, dan bihruksan leh pehhel thiamna hi finna ni tlata kan ngaih avangin smuggling mantu tur hi smuggler karah bihruk a ngaih hun a thleng thei, hei hi policy dik lo a nih thu a sawi.
Vanneihtluanga chuan inthlana vote hmuh tama chaka rorel ringawt ngaihtuahna paih a hun tih sawiin, “Tupawh sorkar se he hnam a ral riai riai si chuan eng nge lukhawng kan neih? Kan dam chhung reilo te-a nghawng neih ve kan duh a nih chuan a hma mite tih ang ringawt ti tur hi kan ni tawh lo,” a ti.
Inthlan dawna fit thar vak a tul tawh loh thu sawiin, “Fit tluan chhuak mi kan mamawh tawh zawk,” tia sawiin, aia upa zawkte hriatna leh thiamna neih let nei tur leh rin ngam khawpa inbuatsaih si lova senior politician hnual suat ngawt a rem loh thu a sawi a. Senior-te pawhin kum 60 pelh tawh lamah chuan tangkaina bik leh eng emaw bik nih si loh chuan inthiarfihlim nachang hriat hi Mizoram political party tinte mamawh a nih thu a sawi.
MPCC President Lalsawta pawhin thu sawiin sorkar tha siam turin Congress a sorkar a ngai a, chutiang a thlen theihna turin nakina danglam tum lovin tunah, engtik lai pawhin danglamna hi miin an hmu tur a ni, a ti bawk.
He hun hi Dr. Henry Zodinliana, President AIPC-in a kaihhruaia a ni.