Presbyterian Kohhran Hmeichhe Inkhawmpui Lian vawi 50-na chu nizan atang khan GSA Playground, Darlawn-ah neih a ni a. Pathianni zan thleng awh turah hian Synod Executive Secretary i/c Kohhran Hmeichhia Rev. V.L. Luaia Hranleh-in inkhawmpui thupui, ‘Pathian nena len dun’ a sawi ang.
Hmeichhe inkhawmpui liana tel tur hian nimin khan Mizoram hmun hrang hrang atangin Darlawn an pankhawm a, nizan khan palai lawm leh report inkhawm neih a ni a, vawiin nilengin rorel inkhawm neih a ni dawn.
Kohhran Hmeichhe Inkhawmpui Lianah hian thupui atan ‘Pathian nena len dun’ (Mika 6:8) hman a ni a, Hemi hmang hian Speaker Rev. V.L. Luaia Hranleh-in thuchah a sawi thin dawn a ni.
Inkhawmpui neihna pandal hi a dung ft. 250 leh a vang ft.165-a zau a ni a, mi 8,000 vel leng tura beisei a ni.
Inkhawmpui thlengtu, Darlawn hi in 1,140 vel an ni a, mihring 5,000 chuang an cheng.
Kohhran Hmeichhe Inkhawmpui Lian thlengtu khuaa chhungkaw tinte chu sorkarin a thlawnin buhfai kg 20 theuh a pe vek a, mipui inhlawhna tur a siamsak bawk.
Nizana palai lawmna leh report inkhawm chu Kohhran Hmeichhe Inkhawmpui Lian Vice Chairman Vanlalhruaii’n Pathian thuchah a sawi a, vawiinah nilengin Darlawn Kohhran Biak Inah palaiten ro an rel ang a, rorel palai ni lote tan rorel hlanin pandal-ah inkhawm buatsaih a ni ang.
Rorel hlan inkhawmah Borapansuri-a evangelist, Saithangpuii Sailo-in Pathian thuchah a sawi ang a, chawhnu lamah C. Januari, Ramhlun South-in Nehemia bu atangin Pathian thu a zirtir ang a. Zan lam Pathian Biak inkhawmah Synod Moderator Rev. Dr. C. Chawnghmingliana’n Pathian thuchah a sawi thung dawn a ni.
Naktuk Pathianni chawhma leh chawhnu inkhawmah Rev. V.L. Luaia Hranleh-in inkhawmpui thupui a sawi ang a, chawhma inkhawmah hian Kristian Chhungkaw dinhmun tehna ‘No Mawi’ dawngtu tur hnenah hlan a ni ang.
Zan Pathian Biak inkhawmah Kohhran Hmeichhe Inkhawmpui Lian Chairman Sailuti’n Pathian thuchah a sawi ve leh thung ang.