AIZAWL: Central Young Lai Association (CYLA) chuan R. Lalzirliana chu District Council & Minority Affairs minister a nihna atanga chawlhtir turin chief minister hnenah ngenna siam nawn an rel.
State Assembly Budget session neih zawh takah District Council & Minority Affairs changtu Minister R. Lalzirliana chuan Autonomous District Council (ADC) mipuite tana thu pai nuam lo tak tur a sawi chungchangah CYLA chuan February 27, 2023 khan thuchhuah siamin DC&MA minister an dem thu leh house-ah ngei ngaihdam dil turin an phut thu an tar lang a. He an thuchhuahah Minister R Lalzirliana chu a hna chanpual laksak tura chief minister an ngen thute ziah lan a ni.
R Lalzirliana hian Assembly budget session tawp ni khan ADC mipuite laka ngaihdam dil mah se, Ningania CYLA CEC meeting chuan DC&MA enkawl tlak loha an ngaih chungchangah engmah hmalakna a awm loh avangin chief minister hnenah R Lalzirliana hna chanpual chu laksak turin ngen nawn leh nise an ti a ni.