Aizawl : Serchhip bialtu MLA Lalduhoma chuan nimin khan Thenzawl-a Victory English School te’n Annual Closing day an hman chu khuallian niin a a telpui a, zirlai titha te hnenah lawmman hrang hrang a sem.
Lalduhoma chuan thu sawiin, ram leh hnam hmelma lian ber pahnih corruption leh ruihhlo chu zirna in atangin zirlaite’n an do a tul tih sawiin, “Hlemhletna leh ruihhlo vangin kan ram leh hnam a chhe mek a, zirna in atangin do a ngai a ngai a, zirtirtute’n helam hawi an zirtir uar pawimawh a ni,” a ti.
Mizoramah sorkar sikul zirtirtu indaih loh a nasat avangin zirna a chhia a, siamthat a tul tih a sawi a. Zirtirtu hlawh tlem zawk te’n mi mal English medium school-ah zirna tha tak an kalpui chu lawmawm a tih thu a sawi a. India rama new education policy chu Mizo hnam leh khawtlang mila her rem a, naupan lai atanga Zonunmawi inzirtir a, mirethei zawk te’n sikul thaa an kal theih na’na hmalak ngaih pawimawh a tul thu leh, sorkar leh kohhran bakah mi mal enkawl sikul te kal rual thiam pawimawh a tih thu te a sawi.
Victory English School Principal Sailianpuia Sailo pawhin thu a sawi bakah award dawngtute puangin, khuallian Lalduhoma’n award a sem a. He school-a kumin atanga High School pawl kaw (9) zirna kalpui tur chu a hawng nghal bawk.
Serchhip bialtu MLA hian nimin zing khan Thenzawl-a puantah zirna hmun tlawh bawkin, a bial chhung Buangpui khuaa MLA fund Rs 1,50,000 hmanga Buangpui M.Z.P Branch te’n zirlaite tana Students Library an sak chu hawng bawk.