German khawpui pakhat, Hamburg-a Jehovah’s Witness inkhawmna hmuna silai hmeh puahah nau pai lai telin mi pasaih an thi tih police-in an sawi.
Ningania beihna thlengah hian silai kaptu hi amah chauhva che a nih thu leh amah pawh a inkap hlum tih an sawi a. Hetianga a chet chhan erawh hriat a la ni lo.
Silai hmet puaktu hi kum 35 mi, Philipp F tiin an sawi a, a beih kohhran pawlah hian member a ni ve thin a, ‘ngaihtuahna tha lo tak tak nei thin’ niin an sawi.
Video thehdarhah chuan hall tukverh pawn atangin silai hi vawi tam tak a hmet puak tih a lang.
A kah hlumte hi an vaiin German vel an ni.
Officer-te chuan Ningani zan dar 9:15 (India-a Zirtawpni zing dar 1:45) pelh hnuah inkahna a awm tih thu an dawng a, Deelböge street, Gross Borstel district-ah a ni tih police thupuangtu, Holger Vehren chuan a sawi.
Officer-te an thlen chuan ‘silaia kah hliam na tak tak an hmu a, thenkhat phei chu an thi’ tih an hmu tih a sawi.
“Officer-te hian building chung lamah silai puak ri pawh an la hria a, in chung an chhoh chuan mi dang an hmu leh a, a kaptu hi a tlanchhe nghal ni ngaih theihna tur a awm lo,” a ti.
Zan dar 9:00 vela silai hmeh puah tan a nih lai hian mi pung khawmin Bible an zir mek nia an hriat thu a sawi bawk.
Silai hmet puaktuin chhawng khatna tukverh atanga silai a hmet puak lai thla lo latu, Gregor Miesbach chuan, “Engnge a tih ka hre mai lo va, ka phone hmangin a che vel chu a thla ka la a, ka bihchian (zoom) hnuah Jehovah’s Witness hmunah silai hmeh puah a ni tih ka hre ta chauh a ni.
“Silai puak ring tak ka hria a, mi pakhatin tukverh atangin a silai a kap a, a thla ka la ta a ni,” tiin Bild chanchinbu hnenah a sawi.
A bul lawka cheng zirlai kum 23 mi, Lara Bauch chuan, “Silai hi hlawm lian deuhvin vawi li a puak a, hlawm khatah hian vawi tam kah a ni thung a, hlawm khat hi second 20 atanga minute khat inkar vel a ni zel,” tiin DPA news agency a hrilh ve bawk.
A tukverh atanga a hmuh dan chuan a chhunga awmte chu mangang takin chhawng hnuai ber atangin chhawng khatnaah an tlan a. “A kaptu hian kawr thim lam a ha a, a che rang em em a ni,” a ti.
Zan dar 9:00-ah sorkar warning app, NINAwarn an tihah chuan tual chhung mite hnenah ‘biak inah tunge a nih hriat lohte an chet thu’ tar lan a ni.
Mi chengte chu police-in hma an lak laia pawn chhuak lo tura hriattir an ni bawk.
Video-ah chuan police hian inkhawmna in atang hian a lo awmte chu an hruai chhuak a, ambulance hmuh tur pawh a awm.
Hamburg Interior Minister Andy Grote chuan police special force leh officer dang thahnem takin a hmun an thutchilh nghal thu Twitter-ah a tar lang.
Silai hmet puaktu chet chhuah chhan hi ‘tun thlengin engmah hriat chian a la awm lo’ tiin sorkar chuan a puang.
Zirtawpni tukah khan German Chancellor Olaf Scholz chuan ‘tharum thawhna rawng tak’ thleng chu a dem thu leh a tuartu chhungkuate a tawrhpui tak zet thu a sawi.
Germany-a Jehovah’s Witness pawl chuan ‘Kingdom Hall, Hamburg-a an member-te inkhawm zo rawng taka beih an ni chu pawi an ti tak zet’ tih an sawi bawk.
Forensic thiamte chuan Ningani zan zankhua inkhawmna in hi tiengin thil chhui theih ang ang an chhui zui nghal.
Germany hi Europe-ah chuan silai khuahkhirhna hmang khauh ber zinga mi niin kum 25 hnuai lamin silai neih phalna a dil chuan a rilruin silai kawl turin a phak em tih fiah hmasak a ngai.
National Firearms Registry-in a chhinchhiah dan chuan kum 2021 khan Germany-ah hian mi maktaduai khat velin silai an nei a. Dan anga neih silai leh a part hrang hrang maktaduai 5.7 vel awm anga ngaih niin a neitu tam zawk hi sapel mi an ni.
December thlaa sorkar paihthlak tuma ruahmanna awm hriat chhuah a niha mi tam tak man an nih hnuah khan German thuneitute chuan silai khuahkhirh lehzual tumin hma an la mek.