Aizawl : Champhai District-a Chawngtui East khua kum 125 (1898-2023) tlin leh, Zoram buai avanga khawkhawm haw kir leh kum 50 (1973-2023) tlin lawmna, Cha- wngtui Community hall-a tunkar Ningania neih chu Art & Culture Minister R. Lalzirliana’n a telpui a. Hriatrengna lungphun a hawn bakah souvenir ‘Chawngtinleri vangkhua Chawngtui East’ tih chu a tlangzarh bawk.
Art & Culture Minister chuan Chawngtui East mipuite chu Zonun zem- awi tlawmngaihna, dikna, huaisenna, inlungrualna leh a dang te chhawmnung zel tur leh ruihhlo laka fihlim tur te in a chah.
P&E Minister ni bawk R Lalzirliana chuan Mizorama hmun 11 ah MW 52 siamchhuak thei tur solar project buaipuia hmalak a nih thu a sawi a. MW 20 pechhuak thei tur Vankal Solar Park trial run neih a nih tawh thu leh tun atanga hun reiloteah hawn tum a nih thu a sawi.
Zirna leh khawtlang siamthat kawngah theihtawp chhuaha hmalak a tul thu leh thangthar zingah Zonun zemawi inzirtir tam a pawimawh thu R Lalzirliana chuan a sawi a. Mizo hmeichhiate hmasawnna chhuanawm a tih thu leh mipate aia an nep bik loh thu pawh sawiin, innghahnatlak leh rintlak ni tura Mizo mipate tanlak nasat a pawimawh thu a sawi.
Nu leh pa, rual u zawkte atanga thurawn lak leh an thu awih chu hlawhtlinna atana kailawn pawimawh hmasa a nih thu pawh sawiin, khawchhak tlangdung chu pipu sulhnu tamna leh Zonun zemawi chhawmnun tlat- na hmun a nih thu a sawi a. Chawngtui East khaw mipuite chu Zonun zem- awi nunpuia chhawmnung zel turin a chah bawk.