Union home ministry chuan kum ruk liam ta, kum 2014 atang khan India hmarchhakah hel chetna a tlahniam nasa hle tih a sawi.
“Kum ruk liam ta chhung khan hel chetna a tlahniam nasa hle a, kum 2020-ah pawh khan a tlem hle a ni,” tiin ministry hian kum tawpa report an siamah an tar lang.
“Kum ruk liam ta chhunga hel dinhmun a hniam zel avang hian Armed Forces Special Powers Act hman pawh Meghalaya leh Tripura-ah chuan hlih tawh a ni a, Arunachal Pradesh-ah pawh thlahdul a ni,” tiin ministry hian a tar lang.
Report-ah hian rei tak awh tawh Bru-Reang Refugee buaina pawh chin fel a ni tih tar lan a ni bawk.
“Prime Minister Narendra Modi-a hmathlir, hmarchhak leh a mi chengte chawikan tumna kawnga hma lakna chuan chak takin hma lam a pan,” tiin report-ah hian ziah a ni.
Tripura-ah Tuikuk 37,000 chu awm nghehtir an ni a, sorkar laipuiin an awmna tur leh kawng hrang hranga hma an sawn theih nan Rs Vbc 600 vel a ruahmansak.
Report-ah hian kum 50 chuang buaina lo awm tawh, Bodo hnam chungchang chu nikum January khan inremna ziakin buaina pawh a reh.
Bodo accord ziah avang hian Bodo hel pawl pakhat, NDFB mi leh sa 1,615 zet chu sorkarah an inpe a ni.
Inremna hnuaiah hian Bodo mite chenna tihchangtlun nan sorkar laipui chuan hnathawhna tur Rs Vbc 1,500 zet a ruahman a. Heng sum hmang hian hna thawh mek a ni.
Hmarchhaka hel pawl hrang hrang ULFA (I), NDFB leh KLO mi leh sa 644 lai chu nikum January khan Assam-ah an inpe bawk tih MHA chuan a tar lang.
MHA-in hmarchhak dinhmun report a siamah hian sorkar laipuia ministry hrang hrangten hmasawnna tura hma an laknate tar lan a ni bawk.