A mualpho thei ang ber a chhuah an nih hnuah Manchester United in kawng dik an zawh chhunzawm lehnghal. Europa League round of 16 first leg-ah Real Betis 4-1 in an hneh.
Inkhelh hma in United hi Liverpool laka an mualphona boruak chuan a la chiah pha a, mahse hmalam thlir a pawimawh thu player leh manager ten an sawi. An tum ang ngeiin football an khel a, hmahruaitu pawh Liverpool lakah sel hlawh nasa ber Bruno Fernandes a ni.
United an tho lehnghal
Erik ten Hag-a’n inkhelh hma in a midfielder rinrawl chu club captain Harry Maguire a khelh loh changin captain a nih zel tur thu a sawi a. A player khelhdanah a lungawi tawk thu sawiin a thlavang a hauh.
Fernandes-a’n a pu rinna chu a tha zawngin a rul let. United inkhelah a pawimawh a, a ke atanga ball tha chhuak hnemin an hlauhawm siamtu zingah a tel fo. Minute 58-naah corner atangin an goal thumna a tauh lut bawk.
United hi Old Trafford-ah an bul tan dan duhthusam a ni a. Marcus Rashford chuan goal hmahruai minute 6-naah chiang takin a khung nghal.
England forward hian tun season-ah inelna hrang hrangah goal 26 a khung tawh.
United in bul an tan tha, goal khung belh nual thei an ni. Mahse, phui loh lai erawh an nei. Ayoze Perez-a’n Juanmi siamsaki atangin an si phurh a sut a, Betis hi hma a hruaipui zui lo chu an vanduai.
United vannei zanah an dinhmun anmahni bawkin an siamtha. Minute 52-naah Brazilian winger Antony chuan an goal hnihna mawi takin a khung.
Fernandes-a’n chhunzawm thuaiin inkhel tawp lamah substitute Facundo Pellistri thawhrah sengin Wout Weghorst chuan loan a a khelhna club tana a goal hnihna a khung chhunzawm.
Inkhel zawhah United boss Ten Hag chuan, “Kan insiamthat a, thawh lehnghal a pawimawhzia hi kan sawi tawh. First half-ah khan kan tha thawkhat viau in ka hria. 3-0 ni thei hial a ni. Mahse vawikhat tihsual kan neih avangin 1-1 a ni.”
“Second half a kan thawhlehna kha a tha hle. Liverpool result kalsan ngawr ngawr lam a ni lo. Tihsual kan nei a, kan inthlahdah lova hmalam pan tura kan inzir zel kha a pawimawh.” a ti.
Gunners in Sporting chelh
Premier League hmahruaitu Arsenal an chak zo lova, mahse away inkhelah tlawm bik lovin dinhmun ngai chelhin an haw.
Estádio José Alvalade-ah Sporting Lisbon in round of 16 first leg hi an thleng a. 2-2 in an inhnehtawk.
Gunners hi goal khung hmasa zawkah tangin France defender William Saliba chuan a tauh lut a. Mahse an hum rei thei lo.
Arsenal in an tlarhnung tihsual tuarin halftime hma leh hnuah goal an chhuah.
A hmasa zawkah goalkeeper Matt Turner a huaisen tawk lova, hei hi remchangah la in Goncalo Inacio chuan an si phurh a sut a. Second half tan hnu lawkah Paulinho in Sporting goal hnihna a khung.
Mahse Gunners in an si phurh an sut har bik lo. Counter-attack rang atang chance siamin Sporting Japanese midfielder Hidemasa Morita chuan an lamah a ti goal palh.
Arsenal manager Mikel Arteta chuan hnehna an chang a, an kal zel dawn a nih chuan hmasawn hle an ngai tih a sawi.
“Chak chhunzawm zel kan duh chuan hma kan sawn hle a la ngai tih hi thil chiang tak a ni.”
“A bikin zaninah kan goal hnih chhuahte kha tihsual vang a ni a, Europe huap inelnaah, away inkhelah khatianga kan che a nih kha chuan result tha neih a har thin hle ang. Kan penalty area tha zawka ven a ngai.” tiin a sawi ve bawk.