Aizawl : Mipui tana chhenfakawm taka an hnathawh hmuh tur awm lo Mizorama sorkarna lo chelh tawhte party te chu Lunglei Municipal Council (LMC) leh Chakma Autonomous District Council (CADC) inthlan lo awm turah a phur phurah an tang niin BJP Mizoram State President Vanlalhmuaka’n a sawi.
Nimina an party pisa ‘Mipui Run’-a Friday Political Session an neihah thu sawiin Vanlalhmuaka hian, tun thla tawpah LMC inthlan a awm dawn a, CADC inthlan lo awm dawn bawk a, chuvangin, he’ng inthlanah hian Mizorama sorkar tawh, an hnathawh mipui tana chhenfakawm hmuh tur awm lote chu a phur phurah an tang nia sawiin,” Mipuite’n fiahna kan hmachhawn dawn a ni,” a ti.
BJP Mizoram State President hian India ramah BJP an sorkar atangin India chu khawvel hriatah dinhmun sangah hlangkai a ni a, BJP sorkarna state-ah pawh hmasawnna nasa takin a thleng niin a sawi a. Mizoram mipuiin hlauh loh tur an hlau a, hlauh tur tak Pathian an hlauh leh si loh avangin Mizoram chu state hnufual berah a awm phah ta niin a sawi.
Kumina Mizoramin inthlanpui a hmachhawn tur LMC, CADC leh MLA general election lo awm turah party hrang hrangin hmasawnna zuar vek mah se, hmasawnna thlen tir theitu erawh central nena inzawm a pawimawh avangin party dang zawng zawng pawhin an thusawia an innghahna ber central tha chakna a nih avangin, BJP an vote chuan hmasawnna an vote a ni tih hriaa, BJP vote turin mipui a sawm.