Aizawl : Kolasib District Oil Palm Growers’ Association-in nimin khan Diakkawn YMA hall, Kolasib-ah Mizoram Oil Palm Inkhawmpui vawikhatna an buatsaih a. J. Hmingthanmawia leh Kolasib Bawrhsap John LT Sanga ten an telpui.
Agriculture Department Secretary chuan Inkhawmpui buatsaih theia Oil Palm Growers’ Association hruaitute thawhrimna leh inpekna fakin, hei hian Oil Palm chu thlai innghahna tlak leh buaipui tlak a nih zia a lantir niin a sawi a. Mizorama Oil Palm chin theihna hmuna ngaih, zaa 24 vel chu Kolasib district chhungah a awm thu sawiin, tunlai thiamna leh hma- nrua te nen tangkawpin Oil Palm rah tam zawk tharchhuahna hmunah Kolasib district chu a siam theih thu a sawi.
Oil Palm avanga sik leh sa leh ram leilung hausakna a chhe zawnga nghawng awm thei awma sawi thin te chu zirchiang turin Mizoramah Pilot research studies kalpui mek a nih thu J. Hmingthanmawia chuan sawiin, hemi hnuaiah hian Agriculture department leh a kaihhnawih department chhu- nga mithiam thlanchhuah te an awm thu a sawi.
Mihring nitin khawsak phunga tel (Edible Oil) mamawhna sang zel avanga India ram pawn atanga tel tam tham tak chahluh thin chhawk zangkhai nan National Mission on Edible Oil – Oil Palm (NMEO-OP) hnuaiah sorkar laipui chuan India ram chhung ngeia Oil Palm rah thahnem zawk tharchhuah a nih theih nan hma a lak mek thu pawh J Hmingthanmawia chuan a sawi a. Mizoram hmar lama Oil Plam chingtute Oil Plam rah lei turin Godrej Agrovet Ltd. an awm bakah chhim lama Oil Plam rah lei turin Patanjali Foods Ltd.-te changtlung zawka inbun turin ruahmanna kalpui mek a nih thu Agriculture Secretary chuan sawiin, Oil Plam rah hralhna man te pawh ennawn zel a nih avangin kuthnathawktute tan innghahnatlak leh rintlak a nih thu a sawi bawk.
Kolasib Bawrhsap John LT Sanga pawhin ram hausakna haichhuak tur chuan kuthnathawktute an pawimawh thu sawiin, hlawhtling tur chuan ruahmanna thui tak siam chunga awmze neia hmalak a tul thu a sawi a. Chumi tur chuan Kolasib district chhunga sorkar department hrang hranga mithiam te rawn thin turin kalkhawmte a chah.
Senior Executive, Godrej Agrovet Ltd. Lalruatkima’n a sawi danin kum 2022-23 chhungin Palm Oil Mill, Bukvanneiah Oil Palm rah Rs nuai 600 man hu an lei a, hemi kaihhnawihah hian thalai thahnem tak tan inhlawhna siamsak a ni. Oil Plam chingtute harsatna sutk- ianpui tur leh an mama- wh ang leitha an lei theih nan te, Oil Plam rah hralh tur a Bukvannei Palm Oil Mill pan thei lo te tan Samadhan- One Stop Solution Centre chu Mamit district chhunga bun tura hmalak mek a nih thu a sawi bawk.
Sorkar thuchhuahin a tarlan danin Oil Palm hi Kolasib district-ah 2005-2006 atanga chin tan a ni a. District ram zau zawng (1,38,251 ha.) atanga chhutin Oil palm chin theihna awm zat 14,141 hactare anga chhut a ni.