AIZAWL: March 29, 2023-a Lunglei Municipal Council (LMC) inthlanna neih tura chuh turin political party pali atangin mi 44-in Municipal Returning Officer-te hnenah hming an pe lut niin sorkar thuchhuahin a tar lang.
LMC inthlan lo awm tur atana nomination file tawp hun hi nimin tlai dar 3 thleng a nih avangin party hrang hrang aiawh candidate-ten nomination an file a. Municipal Returning officer (Ward – I, II, III, IV, V) Donny Lalruatsanga hnenah mi 20 leh Municipal Returning Officer (Ward – VI, VII, VIII, IX, X, XI) M. Misael hnenah mi 24 ten nomination an file a ni.
Lunglei Municipal Council inthlan tur atan hian candidate tinte tan chawlhkar thar, Thawhlehni tlai dar 3 hma inhnuhdawh theihna hun siam a ni a. A tuk, Nilaini-ah symbol i pek leh contesting candidate list puanzar a ni ang.
March 29, 2023 zing dar 7 atanga tlai dar 4 chhung vote thlak theih a ni ang a. April 3, 2023-ah vote tlate hi chhiar a ni ang.