Indian billionaire Mukesh Ambani-a Reliance Group chuan kum 50 zet liam taa beverage brand hlawhtling lo ni tawh, Campa Cola chu tun nipui atanga hralh chhuah leh an tum.
Brand hi a siamtute, Pure Drinks hnen atangin nikum August khan Rs. maktaduai 220-in an lei.
Soda-ah hian cola, lemon leh orange flavour a awm ang.
He drink hi kum 1970 leh 80 chhovah khan a lar thin hle a; mahse, ram dang atanga siam cola brand-in India a luh ve tak avangin a tlahniam zui ta a ni.
Reliance thupuangtu chuan company chuan ‘brand lar tak thin hi chhuah lo awm tawh leh tuna mite thinlungah a tihthar leh theih ngei a inbeisei’ tih The Times of India chanchinbu hnenah a sawi.
Campa Cola (a tira Campa-Cola tia ziah thin) hi India-a Coca-Cola chanchin ropui tak titawptu a ni.
Kum 1950 chhova Coca-Cola-in India a luh khan a lar chakin kum 1970 bawr chho thleng khan soft drink brand lar ber a ni thin.
Kum 1977-a sorkarin policy a siam tharah Coca-Cola hian Indian firm-te hnena chanvo eng emaw zat pe turin a ti a, amaha thil tel hrang hrang, an sawi chhuak ngai loh (secret formula)-te chu puang zar turin a ti bawk.
Hetiang hi an duh loh avangin Coca-Cola chuan India an chhuahsan phah a. A hmun ruak luah tur hian sorkar enkawl company chuan Double Seven (77) a tichhuak a; mahse, hei hi mipui thinlungah a tla na zo lo.
India-a Coca-Cola um tumsaktu ber, Pure Drinks chuan hei hi remchangah lain anmahni pualin soda in chi a tichhuak ta a ni.
Campa Cola tia vuahin a inziahna hawrawp pawh Coca-Cola ang bawk a ni a. Tual chhuak soft drink brand hi nasa takin a lar nghal a, a bikin thalaiin an duh nghal hle.
Fakna an siamah pawh thalaite hip an tum ber a, tagline an hmante pawh mi hip thei tak tak niin ram rilru phawt tak an hmang zel a. ‘The Great Indian Taste’ tih an hmante chu tun thlenga hriat hlawh niin he brand nen hian a inkungkaih nghet hle a ni.
An infakna pakhatah chuan yacht-ah thalai rual chuangin Bollywood lemchan thiam, Salman Khan a inlan tel a, Campa-Cola chu an in a, lâm rem tak rimawi tihrik a ni bawk.
Campa Cola hian print lama infak nan pawh mi hriat mai theih hmangin inpumkhatna lam an tilang nasa a. Pakhatah chuan in paha ‘Times of fun’ leh ‘Times of joy’ an tihte chu a lar hle.
Thalai mai bakah naupang leh tleirawlteah pawh a lar chak hle a, piancham lawm leh chhungkaw thiltih khawmnaah pawh hman lar ber a ni.
A lar mek lai hian kum 1990 tawp lam atangin khatih laia finance minister, Manmohan Singh chuan Indian economy chawikan nan inphal zauna a hawn avangin a tlahniam ta a ni.
Kalphung thlak hian ram dang brand luhna kawng hawngin Coca-Cola ngei pawh a lut leh ta a ni.
Inzar pharh zau tawh leh infak nasa, Pepsi leh Coca-Cola chuan Campa Cola hi an luahlan zui ta mai reng a ni.
Kum 2000 chhovah khan soft drink brand hian Delhi-a an bottling plant pawh an khar ta a, dawrah pawh hmuh zui tur a awm ta lo a ni.