Russia-in hmanraw chak tak tak hmanga Ukraine a beih thar lehnaah mi pakua an thi a, hmanrua an hman zingah hian hypersonic missile pawh a tel.
Russia hian indona a chhuah hlima boruaka invenna atana a hman bak kha chu Kinzhal hypersonic missile hi a hmang zui tawh lo nia sawi a ni.
Tun tuma tha a thawh thar leh hi chawlhkar eng emaw zat hnua Ukraine a beih nasat leh ber tum a ni.
Europe-a nuclear plant lian ber, Zaporizhzhia nuclear plant atanga power pek chhuah pawh a tawp phah hial a; mahse, tihthat leh tawh a ni.
Ningani khan Russian defence ministry thupuangtu, Igor Konashenkov chuan, “Hmanraw tha tak tak, boruak, tuipui leh khawmual atanga hmun hla kap chi, Kinzhal hypersonic missile system pawh telin, kan hmang a, Ukraine sipaite hmun kah a ni,” a ti.
Tun hi January thla tawpa an beih hnua Russian-ten an beih nasat leh ber tum a ni.
Ukrainian sipaite chuan cruise missile 34 leh Iranian siam Shahed drone pali an kah thlak thu an sawi ve bawk.
Kinzhal ballistic missile paruk erawh an kah thlak theih loh thu an sawi a, hengte hi Kh-22 anti-ship missile leh S-300 anti-aircraft missile an ni.
Ukrainian air force thupuangtu chuan, “tun hi missile chi hrang hranga beihna lian kan tawn hmasak ber a ni,” tiin a sawi niin Reuters news agency chuan a tar lang a. “A hmaa mite ang a ni lo,” a ti.
President Vladimir Putin chuan Russia hi ballistic hypersonic missile tam zawk neih tuma an inruahman thu a sawi a, heng ralthuam hi ri aia a let nga vel zeta thlawk chak a ni.
An beih zingah hian hmar lama Kharkiv, chhim lama Odesa leh khawthlang lama Zhytomyr te a tel a, hmun tam takah power an neih loh phah.