Mizoram Pradesh Congress Committee (MPCC) Treasurer Zodintluanga Ralte, MLA chuan tun ang huna MNF party-a la awm chu thil zahthlak tak a nih thu a sawi.
Thorang bialtu MLA hian a bial chhung khaw hrang hrang fanga a zin meknaah vantlang inkhawmah thu sawiin, “Tun hnaia MNF party president-in Lunglei Municipal Council inthlang tura boruak siam tuma Lunglei a tlawhin thil sawi fuh theih a nei lo a, Lunglei mipuite tan thu dik leh rintlak pakhat mah sawi lovin a haw leh a ni,” a ti.
Zodintluanga Ralte chuan MNF party chu an minister-ten chakna thahruai chhe tê an la neih leh sum hmanga lei tur zawn mai loh chu tih theih an nei tawh lo a. An tihhlawhtlin loh tur chiang sa tiam kawngah erawh tluk ngaihna an awm lo a, anni hian Lunglei mipuite hi an hmangaih tak tak lo niin a sawi.
LMC inthlanah Lunglei mipuiin MNF an chaktir dawn lo nia sawiin, “Minister vote thlakna huam chhunga feh kawng bote an awm tawh lohna turin Lunglei mipuite pawh kan fimkhur hle a ngai dawn a ni,” a ti.
Thorang bialtu MLA hian a bial chhunga Congress sorkarin NLUP hnuaia hmunphiah ching tur an thlanten tun dinhmunah Rs. nuai 500 chuang man an hralh bakah hralh mai tur thahnem tak an la neih laiin, nikum lama MNF sorkarin SEDP Rs 25,000 an sem dawngtu tam zawk chuan an hman zawh tawh thu leh hlawhtlinpui chu sawi loh, hlawhtlinpui ngaihna a awm loh thu a sawi.
ZPM chungchang sawiin Zodintluanga Ralte hian, “ZPM hian Mizoram khaw hrang hrangah bel ruak ring tak takin an vaw ri mek a. An bel ruak ken kual hi vaw sawi zo pawh an awm lo a, anmahni suihkhawmtu hrui hrual a dul tawh lutuk a, suih marsak an chakawm lek lek thin zawk a ni,” a ti.