West Ham United in Europa League Conference quarter-final an hnaih ta viau a. Round of 16 first leg inkhelah 2-0 in AEK Larnaca an hneh.
AEK Arena a Ningani zana inkhelah Hammers tan hian Michail Antonio chuan first half-ah goal hnih a khung a. Tun season-ah Europe huap club inelna lian pathumnaah hian match kua khel tawhin hnehna an la chang vek.
Hammers in chiang takin chak an phu a, second half-ah Antonio bawkin an goal thumna khung teuh hle in goal ban dinglam a pet per.
Inkhel tan tir lamah Cypriot club in West Ham an tibuai ve thei thova, nimahsela inkhel a kal rei deuh hnuah Hammers in ngai an awh a. Player malkhai a theihna nei sang zawk an nihna a lang.
Hammers manager David Moyes chuan, “Kan result-ah ka lung a awi hle. Kan inkhel thlirlet khan hun engemaw chen chhung kha chu duhthusam lo leh tha tawk lo lai ka hmu hnem. Mahse a pawimawh ber chu hnehna chan hi a ni.”
“Goal hnih kan khung a, khung belh nual thei pawh kan ni. Inkhel tan hma khan 2-0 a ni dawn tih min hrilhlawktu awm se lawm takin ka pawm ang.”
“Europe huap inelna hi chu a danglam a, chuvangin a boruakah hian kan inpumpek a, a thui thei ang ber kan kal a tul.” tiin a sawi.
Inkhel dangah Fiorentina in an mualah hnehna an chang hram a. Second half-ah Antonin Barak chuan goal khungin 1-0 in Sivasspor lakah an chak hram.