ZPM General Secretary Lalmuanpuia Punte chuan Lunglei Municipal Council (LMC) inthlan lo awm turah ZPM-in candidate an neih that ber thu sawiin, ruling party MNF chu candidate tifel har ber an nih thu a sawi.
Zirtawpnia ZPM Upa Committee Chairman Rosiamhnuna Khawlhring kaihhruai an pisaa chhung inkhawmah thu sawiin Lalmuanpuia Punte chuan an party chu LMC atan an inbuatsaihna a rei tawh a, Lunglei khawpuiin khawpui inrelbawlna tha tak, bul tanna tha tak a neih theih nan theihtawp an chhuah thu a sawi.
LMC inthlanna turah ZPM chu candidate nei tha ber party an ni tih sawiin Lalmuanpuia Punte chuan, “Ruling party-in candidate an tifel har ber. Kan candidate-ten party dangte thlemna itawm tak an tawk chungin Lunglei hmasawnna duh avangin ZPM candidate ni chunga an ding nghet tlat hi chhuanawm kan ti a, an duhtlannaah hian kalphung thar a lang nghalin kan hria. Lungleiah ZPM boruak a tha a, LMC inthlanah pawh sorkarna siam theih ngei kan inbeisei hle,” a ti.
LMC hi March 29-ah an inthlang dawn a, April 3-ah vote tlate chu chhiar a ni ang.