Aizawl: All Mizoram Petroleum Dealers’ Association (AMPEDA)-in tuialhthei dahkhawlna, oil depot siam kawnga hma la chak turin Mizoram sorkar leh IOCL an phut.
AMPEDA chuan Inrinni khan Berawtlang Tourist Centre-ah an din champha vawi 13-na lawmin India rama oil company lian pathum – Indian Oil Corporation Ltd. (IOCL) – Hindustan Petroleum Corporation Ltd. (HPCL) leh Bharat Petroleum Corporation Ltd. (BPCL) ten Mizorama oil depot neih an duh ang ngeia Mizoram sorkarin a hmun ngaihtuaha ruahmanna siam se an duh thu an sawi.
Oil depot hmun tur Sihhmui lamah en fel ni tawh mah se hmalakna a muang an tih thu leh sorkar leh IOCL chu oil depot siam kawngah rang taka hma la turin an phut a. “Tun atanga thla thum chhung ngeia inremna thu ziak turin kan phut a, kan hunbi tiam chhunga hmalakna a awm loh chuan AMPEDA-in kan thiam dan angin hma kan la dawn,” an ti.
AMPEDA din champha lawmna inkhawm hi an President K Lalnghakliana’n a kaihruai a, Vice President Lalbiakzama’n thu thu sawiin, an pawl directory a tlangzarh bawk.