PWD changtu, Chief Minister Zoramthanga hoin Durtlang Leitan leh Sihphir inkar kawng laih zauh leh siam that hna thawh tur chu Inrinni khan laih tan a ni.
Durtlang Leitan leh Sihphir inkar kawng laih zauh hna thawh tur thui zawng chu km 10.25 a ni a. He kawng siam hna hi Central Road Infrastructure Fund (CRIF) atanga sum hmuh Rs. Vaibelchhe 46.57 hmanga thawh tur niin, a kawng chhuat zau zawng chu meter 8 a ni a, lirthei zawh tur chin chu meter 6-a zau a ni.
Kawng laih tanna puala Sihphir-a Rohrenga Hall-a inkhawm buatsaihah chief minister chuan tuna kawng an laih zauh leh siam that hna thawh tur chu National Highway anga zangnadawmna sum pek tur a awm ve loh avangin sorkar ram bak ram lak hek ngaite chu zangnadawmna inpek theih a nih loh thu a sawi a. Hetiang a nih vang hian vang hian sawi fel ngai a awm thute chu ram neitute leh khawtlang hruaitute, tlawmngai pawlte thawk hova theihtawp chhuah tlan a tul thu a sawi.
Aizawl East I bialtu hian Mizoramin hmasawnna ruhrel lian, a bik takin intlawhpawhna lama hmasawnna a hmuh chhoh dan chu lawmawm a tih thu a sawi a. Hmanlai hun atanga thlir a huphurhawm taka a ngaih rel kawng neihte, kawng zau tha leh inkalpawhna dangte chu vawiinah chuan tangkai taka hman niin, siam belh leh hmalak mek te a nih zel thu leh, beiseina nen hmathlir tha tak neih a, tumruhna nen umzui a hlawhtlinna a insiam thin thu a sawi.
Kawng laih zauh leh siam that hna hi SLT Infracon Pvt Ltd.-in an thawk dawn a, agreement amount hi Rs. 35,53,00,000 niin thla 18 chhunga thawh tura ruahman a ni.
Aizawl – Durtlang – Lungdai – Kawnpui kawng hi Border Road Organization (BRO) te enkawl a ni a. He kawngpui hi Silchar leh Aizawl inkar inkalpawhna hmasa, tun thleng pawha pawimawh leh hman ber a ni a. A kawng awm danin duhthu a sam loh avangin, kum 2004 khan Aizawl leh Durtlang inkar kawngpui bik hi siamthat a lo ni tawh a. Hemi hnu hian Leitan atanga km 3.180 pawh hi Intermediate-lane tura laih zauh hna thawh a lo ni tawh a ni.