Assam-a Udalguri district-a police-in mi sual nia an hriat avanga mi pakhat an kah hlumna chu chhui chian a nih hnuah a ni lo zawk an that tih hriat chhuah thar leh a ni a, an mi thah hi an tum loh zawk niin ‘an hai palh’ vanga thah nia sawi a ni.
CID-in he thil thleng a chhuinaah mi thah tak chu Kenaram Boro (Kenaram Basumatary tia an hriat bawk) a ni lo va, Dimbeswar Muchahary zawk a ni a, ani hi a chhungte chuan ‘lo neitu ve mai’ niin an sawi a. Police erawh chuan pawikhawihnaa inhnamhnawihna nei ve tho niin an sawi thung.
February 24-a Rowta huam chhunga Dhansirikhuti khuaa inkahnaah hian an zinga pahnihin hliam an tuar ve bawk niin police chuan an sawi.
Boro-a nu chuan a fapa ngei a ni tih a finfiah hnuah a ruang chu a kutah hlan a ni a; mahse, vui liama thlah fel vek a nih hnuah Muchahary-a chhungte chuan an fapa zawk a nih thu an sawi leh ta si a ni.
Police hnenah complaint an thehlut a, Chief Minister Himanta Biswa Sarma chuan March 2 khan CID chhui chian turin thu a pe zui nghal bawk.
A ruang an phum tawh chu hai chhuah leh niin DNA endik that leh a ni a, chutah chuan Muchahary-a a nih thu leh Boro-a a lo ni reng reng lo tih hriat a ni ta tih police chuan an sawi.
Dan pawna awm mek, National Democratic Front of Bodoland-a tel thin, Kenaram Boro-a hi Assam leh Meghalaya-a ralthuam nena mi rikrapa pawikhawihna thubuai eng emaw zat nei a ni a. A hma pawhin a ralthuamte nen vawi eng emaw zat man a lo ni tawh tih police officer pakhatin a sawi.
Gobla tia an koh bawk thin, Muchahary-a ve thung hi ‘pawikhawihna nei’ tia hriat ve tho niin a silai nen pawh man a lo ni ve tawh bawk a. Mi ruk bo thubuai pawh an nei ve ve niin police hotute chuan an sawi bawk.