Aizawl: Health Minister Dr R Lalthangliana’n Inrinni khan Zoram Medical College (ZMC) tlawhin ZMC hotute leh health deptt. hotute nen ZMC hmasawnna hrang hrangte an thlirho.
ZMC-in hmasawnna a neih hrang hrangte bakah ZMC mamawh hrang hrang leh tihchangtlun zel dan turte health minister ho hian sawiho a ni a. ZMC hotuten thawktu indaih lohna, building leh quarters chei that ngai leh mamawh dangte an lo thlen a, sum awm dan azira ngaihtuahsak zel an tum thu minister chuan a sawi.
Health minister chuan ZMC dinhmun hrang hrang sawiin khum 480 vel awm chu a vaiin hun reilo teah hman theih vek a ni dawn tih a sawi a. ICU bula paying cabin mi 50 vel len theihna pawh hman theih thuai a ni dawn tih sawiin, doctor-ho exam conduct-na tur hmun an siam pawh an peih fel tawh thu a sawi.
ZMC Complex-ah VRDL Lab leh MRI research centre din thar a nih tawh thu leh MRI leh C.T. Scan khawl pawh tangkai taka hman a nih tawh thu pawh health minister chuan a sawi a. ZMC-in hmasawnna hrang hrang a nei zel chu lawmawm a tih thu a sawi.
Health minister-in a sawi danin ZMC-ah MBBS zirlai 485 an awm a, kum 2018 batch-ten thla leh atangin internship an tan ang a. ZMC hnuaiah health ministry leh ICMR atangin research project 10 vel kalpui mek a ni.
Dr R Lalthangliana hian ZMC-a department hrang hrang leh building hrang hrangte dinhmun a enfiah nghal bawk.