Covid-19 len lai, mipui khuahkhirhna khauh taka kalpui a nih lai khan Mizoramah innei thar an tlem phah lo va, hri len hma, 2019-20 aiin hri len hnu, 2020-21-ah innei thar an tam zawk.
Registrar General of Marriages-in an chhinchhiah danin April, 2019 atanga March, 2020 chhung khan innei thar, sorkara inziak lut 2,694 an awm a. Hri leng avanga lockdown kalpui a nih hnu, April, 2020 atanga March, 2021 chhungin innei thar 3,703 an awm a, hri len hnua innei thar tam zawkna chu 1,009 a ni.
Khawvelin hri leng a hmelhriat kum hnihna, 2021-22-ah erawh innei thar a kum hmasa aiin an tlem deuh thung a. Sorkara inziak lut 1,204 an awm a. Hemi kum hian Mizoramah April atanga kum tawp thlengin lockdown kalpui fo a ni.
Nupa tuak tharte sorkara an inziah luhna tur dan, The Mizoram Compulsary Registration Marriages Act, 2007 hi kum 2008 khan hman tan a ni a, he dan hnuaiah hian innei thar apiangte chu sorkarah an inziak lut tur a ni.
Registrar General of Marriages hotuten The Zozam Times an hrilh danin he dan hman tan a nih atanga March, 2022 thleng khan innei thar sorkara inziak lut mi 35,196 an awm tawh a, an zinga mi 32,611-te chu Kristian dana innei an ni a, Hindu dana innei 157, Muslim dana innei pakhat, Budhist dana innei 2,424 leh sakhaw dang dana innei pathum an awm bawk.
The Mizoram Compulsary Registration Marriages Act hnuaiah hian nupa tuak tharten an inneih atanga thla khat ral hmain sorkarah an inziak lut tur a ni a, hun tiam a ral hnuah chuan late fee chawi zel a ngai a ni.
Registrar General of Marriages hotute chuan he dan hnuaia inziah luh hi mipuiin an ngai pawimawh chho ta viau tih an sawi a, sorkara inziak lut lo, a hnua certificate mamawh leh si, late fee thahnem tak chawia inziak lut tha lehte pawh an awm tih an sawi bawk a ni.