Premier League champion lai Manchester City in hmahruaitu Arsenal nen an inkar chu point hnih a ti zim lailawk turin Crystal Palace lakah an chak a, 1-0 a hnehna chang turin an beih nasat erawh a ngai.
Crystal Palace hi tunhnai a che tha hleithei lo nimahsela Selhurst Park-ah City in hnehna chang turin an dawhtheih a ngai hle a. Darkar khat chuang chungnung zawk ni chunga an khingpuite an nawr hnuah an mamawh goal an khung thei hram.
City goal hi striker Erling Haaland-a’n penalty an hmuh atanga a khung a ni a. Tun season-ah league goal 28 a khungna a ni a, minute 78-naah Michael Olise-a’n Ilkay Gundogan laka a foul avanga penalty kick hi a chawi a ni.
Mikhual team zawk City hi bul tan tha zawk nimahsela an huntha neih an hmang thei lo fova, Palace in hlauhawm taka nawrlet nei lem lo mahse an inveng nghet.
Vicente Guaita chuan Rodri laka save tha a siam a. Jack Grealish leh Haaland te pawhin goal an khung teuh.
Manchester City manager Pep Guardiola chuan, “Arsenal hi che tha tluang tak an ni a, mahse beisei kan la nei ve zel. Thlasik lai inkhel dik tak a ni, chetthat a har a, mahse a che tha zawk kan ni a, a tawpah goal kan khung.” tiin a sawi.
Chelsea an harh
Season hautak an hman hnuah Chelsea kaldan a fuh chho dawn niin a lang a, a zawna vawi thumna atan hnehna chang turin che chhia Leicester City an hneh.
Leeds United leh Borussia Dortmund te an hneh zawn hnua inkhelah hian Blues in minute 11-naah Ben Chilwell hmangin goal an khung a. Joao Felix leh Leicester City midfielder Kiernan Dewsbury-Hall ten goal ban an pet per ve ve hnuah Felix-a goal khung pawmsak loh a ni bawk.
Patson Daka in first half-ah an si phurh a sut a, mahse halftime hma in Kai Havertz-a’n Blues goal hnihna a khung a. Mykhailo Mudryk goal khung pawm loh awm leh mahse Mateo Kovacic chuan an goal thumna a khung.
Liverpool in Bournemouth an ngam lo
Season tharah UEFA Champions League khelh tum viau mahse an beisei ang result an nei lo. Tlak hlauhawm a awm Bournemouth in 1-0 in Liverpool an hneh.
Vitality Stadium-ah Liverpool in an tlarhnung inthlahdah chu an tuar a. Minute 28-naah goal chhuahin vengtu nei lo Philip Billing chuan tun season a a Premier League goal rukna a khung.
Reds tan Virgil van Dijk leh substitute Diogo Jota ten first half hma leh hnuah goal khungna huntha nei mahse an Cherries in goal lut tur an veng hman hram a. Jota penalty hlawhchhuah hi Mohamed Salah chuan a pet goal lo bawk.