Myanmar sipai roreltuten an ramah internet titawp mah se mipuiten thuthar an hriat zel theihna turin thalaiten a rukin chianchinbu an thehdarh.
Kum 30 mi, Lynn Thant (hming tak thup) chuan he chanchinbu a ruka tihchhuah hi bul a tan a, thlaiten an ngaihven theihna turin a hmingah Molotov a phuah.
“Chanchinthar pek chhuahna kawngah min dal mah sela, kawng dang kan zawng ve ta mai a, keini tan chuan thil hlauhawm tak a ni,” a ti.
Ram chhunga mi tam takin PDF hmangte leh print chhuah hmangin chanchinbu chu a darhzau thei tur berin sem chhuah a ni a, Yangon, Mandalay leh hmun dang dangah tihchhuah mek a ni.
Assistance Association for Political Prisoners-te chuan police leh sipaiten mi 3,000 chuang an man tawh thu an chhinchhiah.
Lemchan thiam, zaithiam leh social media-a lar tak tak mi 200 chuangte chu man theihna tur arrest warrant list-ah dah an ni a, sipai rorelna do zawnga che thin nia an chungthu relsak an nih chuan kum thum chhung lung ina tang thei dinhmunah an ding mek.
“Sipai rorelna dodalna thu ziaka kan thehdarh vang hian tan inah hun rei tak min awmtir ngei ang. A buaipuitute zinga pakhat hi man kan nih chuan mi dangin Molotov newsletter hi an rawn buaipui chhunzawm ang. Tu emawin kan thih phah chuan a aiah mi dang a rawn ding ang. Hnehna kan chan hma chu he chanchinbu hi a chhuak reng ang,” tiin ‘V for Vendetta’ hmaikawr vuah chungin Lynn Thant hian ram dang chanchinbu mite a kawm a ni.