Aizawl: Corruption do pawl, Society for Social Action (SOSA) chu tun hnaiah corruption hluar zel do tura intuaithar lehin, chak taka hma lak an tum.
Inrinni khan Aizawl Dawrpuia Bualhranga in-ah SOSA chu an thukhawm a, he thutkhawmah hian dan hre mi (lawyer) leh dan zirlai (law student) mi pakua te member atan an la lut tharin, intuaithar leh an tum a ni.
He thutkhawmah hruaitu pawh insiam fel nghalin President-ah C Rohriatpuia, Secretary atan Aldrin Zothanmawia leh Treasurer-ah F Lalzarzovi te ruat an ni a. Bualhranga, F Hmingthanga, Rual Zakhuma leh SL Sailova te patron atan ruat an ni bawk.
Kum 2005 khan SOSA hi din niin, he pawlah hian Rual Zakhuma IAS (Rtd.) leh SL Sailova IAS (Rtd.) te President an lo ni tawh a. Mizorama corruption case lian leh langsar pahnih, tun hnaia thuremna chhuak Tuirial Hydel Project siamnaa compensation dik lo chungchang leh PMGSY kawng laihnaa thil diklo nasa lutuk CBI-in an chhui theihna atana PIL theh luttu an ni.
PRISM leh FOMTU te nen corruption chungchanga FIR tam tak an theh luh avangin, mi eng emaw zatin thiamloh an chan mai bakah, tunah hian thubuai nei eng emaw zat an la awm a ni.