Aizawl: ZPM Leader Lalduhoma chuan Pathian leh mipui zara an sorkar ve hunah an thutiamah an rinawm lo a nih chuan an party chhuahsan leh tura mipui ti ngam awmchhun party an nih thu a sawi.
Inrinnia ZPM Aizawl East I Block-in |huampui YMA Hall-a Block Conference an buatsaih hmanpuitu Lalduhoma chuan tunlai hian party-ah ni lo, policy-ah zawk rinawm tur a ni tih thudik pawmtu leh nunpui theitu pung zelin politics-ah harh tharna a thleng nasa niin a sawi a. “Pathian leh mipui zara kan lo sorkar ve hunah pawh Pathian leh mipui hmaa kan thutiamah kan rinawm lo a nih chuan ‘min chhuahsan leh dawn nia’ ti ngam awmchhun party kan ni a. Party dang chuan an policy lam an sawi tawh lo va, party a rinawm an inzirtir thin a ni. Kawng dik lova min hruaitute zui hi mi dik lo nihna zawk a ni,” a ti.
Congress leh MNF te chu an rorel kalphung chu kalphung hlui ve ve a ni tih sawiin Lalduhoma hian, “Chief minister chair-a thu an inthlak a, an party symbol a danglam a, an flag a inang lo a, kan ram an kaihhruai dan chu a inang reng a ni,” tiin, he kalphung hi kalphung thar hmangin ZPM chuan thlak an duh a, kalphung thar atan chuan mi tha mamawh a nih thu a sawi.
ZPM Working President K Sapdanga pawhin thu sawiin, Lunglei Municipal Council (LMC) inthlan lo awm turah an inbuatsaihnaah mi tin maiin candidate nei tha ber nia an sawi chu an khingpuite pawhin an pawmpui viau nia a hriat thu a sawi a. Candidate inchuhna nasa tak kara candidate tha tak an nei thei chu thil lawmawm tak a nih thu sawiin, “Lunglei lama ka hruaituten kan thupui pakhat chakna ni lo vin, thiltih theihna ni lovin ka thlarau zawkin le, tih thu hmangin hma an lo la tan der tawh mai a, kan lawm hle a ni,” a ti.