- Ruata
Honda Motorcycle & Scooter chuan OBD2B mil kum 2023 model H’ness CB350 leh CB350RS chu India ram market-ah an tlangzarh leh ta.
Honda H’ness CB350 leh 350RS ho hi Honda dealership-ah pawh, BigWing dealership bikah zawrhchhuah thin a ni a, tunah hian thawnchhuah tan mek niin March thla tawp lamah chuan India rama an dealer hrang hrangah an pekchhuah kim theih an inbeisei a. 2023 Honda CB350 hi Rs 209,857 man a ni ang a, 2023 Honda CB350RS hi Rs 214,856 man a ni thung ang a, a man tarlan te hi, ex-showroom, Delhi man mil a ni a. Mizoramah chuan a danglam hret awm e.
Japanese two-wheeler siamtu lar leh hlun Honda hian heng an bike hralh kal pahnih, kum 2023 model an tihchhuah tharah hian a leitute tan customisation section ‘My CB, My Way’ tih an duang a. Hetah hian Honda siam ngei, Genuine Accessories custom kits te chu BigWing dealerships hrang hrangah March thla chhung hian dah fel an tum a ni. 2023 Honda CB350 range ho hian 350cc, air-cooled 4 stroke OHC single-cylinder OBD2B compliant khawl, PGM-FI technology-a thawm an hmang a. He khawl hian maximum torque 30Nm chu 3000rpm-ah a pechhuak thei a ni.
Honda engineer ho chuan main shaft coaxial balancer chu a cylinder-ah primary & secondary vibrations an tih, a nghawr ti awm lo turin an duang a, hei hian he bike thatzia pawh a pholang thei ang a. CB350 ho khu chhuahna, a exhaust system tailpipe lian tha tak, 45mm a hmang a, hei hi ri mawi tak pe chhuak thei tura an duan a ni. 2023 Honda CB350 bike te hian Honda Selectable Torque Control (HSTC) an hmang bawk a, hei hian a ke hnungin nal leh kawng thila a phiat tur a veng a, a ke hnung leh hma vir dan ngun takin a vil a, tichuan a injector atangin a ke phiat nasa tur leh tluk hlauhawma a awm tur chu a thunun ta a, hei hi khawl changkang leh tunlai tak a ni. He HSTC hi duh chuan a ‘off’ theih bawk a, a khalhtu duhthlanna leh khalh duh dan azirin a hmangin a hmang lo thei a, thil tha tak a ni. He system tha tak mai hi hman a nih chuan a digital display-ah ‘T’ indicator a lo eng thin dawn a ni.
2023 Honda CB350 leh CB350RS DLX Pro variant te hian Honda Smartphone Voice Control System (HSVCS) an nei tawh dawn bawk a. Hei hi bike khalhtuin a smartphone-a bluetooth hmangin a thunun thei ang a. He hmanraw hmang hian phone call, navigation, music playback leh message te a thunun theih dawn a ni.
Heng bike tharah te hian Assist & Slipper Clutch a awm leh bawk a, hei hian clutch lever operation load a tihniam a, nuam takin gear a thlak tir thei a. A Advanced Digital-Analogue Meter-ah hian torque control, ABS, side stand indicator with engine inhibitor, gear position indicator leh battery voltage te a tel bawk a ni. 2023 Honda CB350s hian Emergency Stop Signal (ESS) a nei tawh dawn bawk a, bul vela lirthei ding thut emaw, speed ti hniam thut emaw an awm chuan a khalhtu leh a bike khawl a hrilh zung zung dawn a ni.
He bike thar te hian braking lamah chuan a hmalamah 310mm disc leh a hnunglamah 240mm disc, dual-channel ABS awm tel a hmang ang a. 2023 Honda H’ness CB350 split seat chu standard angin a nei vek tawh danw a. A tira tarlan tawh angin Honda hian heng bike pahnih siamdanglam duh tan company duan thlap customisation kit an tichhuak a, hei hi – My CB, My Way tiin an vuah a ni. Honda Genuine Accessories anga hralh tur a ni a, heng customization kit-ah te hian Honda chuan 1 year standard warranty an pe dawn a ni.
Honda bike mawi leh lei hlawh tak, changkang bawk si CB350 huang bik chu a thar, thil thar tha tak taka thawm a lo chhuak leh ta a. Bike ngainatute tan thu lawmawm tak a ni a, dealer-ah pawh a lei theih thuai dawn a ni.