Barcelona in a kar zawnin league inkhelah hnehna chang turin an beih fe a ngai a, 1-0 a chak nawnin an chakna goal hi winger Raphinha khung leh bawk a ni.
Pathianni zanah San Mames-ah Athletic in league hmahruaitu ni lai an mikhual a. Blaugrana in kartawp a El Clasico an khelh tur atan dinhmun duhawmah indahin league a an hmahruaina chu point 9 in an tisang lailawk a. Real Madrid nen an inkhelh hunah hnehna an chang a nih chuan an hmahruaina paihthlak a huphurhawm tawh ang.
Barca chakna hi kar hmasa a Valencia laka player pahnihte bawk niin midfielder Sergio Busquets ball pek tha tak chu Raphinha in tun season a a goal 9-na ni turin a pet lut chiang hle.
Goal an khung na bak erawh Barca in chance chiang tak insiam an harsat a, lehlamah Athletic hi khel chhe lovin goal bar vawi hnih an tihper bakah Inaki Williams goal khung chu sawizui hlawh taka pawm loh a ni bawk.
Inkhel zawhah Barca coach Xavi Hernandez chuan, “Nidang ang tho a ni. Goal nawr lamah hma kan sawn a ngai.”
“Inkhelh harsatna stadium-ah 1-0 in kan chak a, a tawp thleng a tang tluan tur khan kan beih fe a ngai. Kan dinhmun tha mahse hmalam kan siamthat a ngai.” a ti.