Aizawl: National Programme for Control of Blindness & Visual Impairment (NPCB&VI)-in World Glaucoma Week pualin nimin khan Kulikawn YMA hall-ah Mizoram Upa Pawl member-te tan a thlawna mit entirna an buatsaih a, mi 90 chuang an inentir.
NPCB& VI State Programme Officer Dr Lalbiaksiami chuan kum upa lamte khaw hmuh a fiah theihna tura an dinhmun dik tak thlithlaisak chu chhung tin mawh a nih thu a sawi a. Mit enkawl that pawimawhna sawiin zirtirna a pe bawk.
World Glaucoma Week hi kum tin March thlaah hman thin a ni a, kuminah hian March 12-18 chhungin hman tur a ni.
Glaucoma hi mitdelna thlentu tam ber dawttu a ni a. Kum naupang atanga kum upa thlenga neih theih a ni.
Hetiang a nih avang hian tun tum World Glaucoma Week-ah pawh regular taka mit check-up leh optic nerve damage (mit hrui ro) neih leh neih loh entir a pawimawhzia tlangaupui a ni.