Aizawl: Congress party-in Lunglei Municipal Council (LMC)-a sorkarna an siam chuan mipuite phurrit lo thei ang berin an kalpui dawn niin MPCC Treasurer Zodintluanga, MLA chuan a sawi.
Lunglei District Congress Committee-in Congres Bhawan, Lungleiah political session an nei a, he hun hmanpuitu Zodintluanga Ralte chuan, “LMC a pian rualin kalpui tam tak a nei dawn a, chhiah chi hrang hrang chawi tur a awm dawn a, in sak dawn pawhin buaipui ngai tam tak a awm belh dawn a. LMC-ah Congress party a sorkar chuan mipuite phur tirit lo thei ang berin kan kalpui dawn a ni,” a ti.
CLP leader hian Congress sorkar khan thil thui tak an ngaihtuah avangin LMC din an hmanhmawh lo a, vawiinah chuan an hmachhawn ngei a ngaih tak avangin phur takin an hmachhawn dawn niin a sawi a. “Candidate pawh kan nei tha a, sorkarna pawh kan siam ngei dawnin a lang,” a ti bawk.
Zodintluanga Ralte chuan Chief Minister Zoramthanga’n sorkar laipuiin ram hmasawnna tur hnathawh nana ruahman, Special Assistance to States for Capital Investment (SASCI) sum a sawi chu tunah hian Mizoram khaw hrang hrangah MNF party miten sum siam nan an hmang mek a, he sum hmang hian LMC inthlan leh kumin kum tawpa inthlanpui lo awm turah inlei tlin leh ngei an tum dawn niin a sawi a. “He SASCI sum hi loan a ni a, kum 50 hnua rulh tur a ni a, Pu Zoramthanga hian a rul hman tawh dawn lo a, MNF hian an rul dawn lo a, hun lo la awm tur a kan tu leh fate phurrit nasa tak an siamsak a ni,” a ti.
Tun hnaia South Tuipui bialtu MLA-in Aizawl Municipal Corporation (AMC) bultantu an nih thu a sawi chu thu dik tawk lo a nih thu a sawi a. AMC chu MNF sorkar hmasa, kum 2007-ah assembly house-ah a bill pass ni mah se, MNF sorkarin an sorkar chhung khan hma an lak chhunzawm tak loh avangin kum 2008-a Congress an sorkar khan a ruangam leh kalphung tur zawng zawng an duang tha vek a, AMC inthlan hmasa ber an buatsaih niin a sawi.
He hunah hian kumin MLA inthlanpui neih tura Lunglei South INC candidate tur Dr. R.K. Lallianthanga pawhin thu a sawi bawk.